អធិការបតី លោក Olaf Scholz នឹងអំពាវនាវដល់សភារបស់ប្រទេសអាល្លឺម៉ង់ នៅថ្ងៃចន្ទ (ទី១៦ ខែធ្នូ) នេះ ដើម្បីឲ្យប្រកាសថា មិនមានការបោះឆ្នោតដកសេចក្ដីទុកចិត្តលើរូបលោកឡើយ ដែលជាការបោះជំហានផ្លូវការដំបូងឆ្ពោះទៅរកការធានាការបោះឆ្នោតមុនអាណត្តិ ក្រោយការដួលរលំរដ្ឋាភិបាលរបស់លោក។

ការចាកចេញកាលពីខែមុនរបស់គណបក្សប្រជាធិបតេយ្យសេរី (FDP) ពីរដ្ឋាភិបាលចម្រុះ ៣ភាគី បានធ្វើឲ្យគណបក្សសង្គមប្រជាធិបតេយ្យ (SPD) របស់លោក Scholz និងគណបក្ស Greens កំពុងគ្រប់គ្រងប្រទេសដោយគ្មានសំឡេងភាគច្រើននៅក្នុងសភា នៅពេលដែលប្រទេសអាល្លឺម៉ង់ប្រឈមមុខនឹងវិបត្តិសេដ្ឋកិច្ចដ៏ធ្ងន់ធ្ងរជាលើកដំបូង ក្នុងរយៈពេល ២០-៣០ឆ្នាំ។

ច្បាប់ដែលត្រូវបានបង្កើតឡើង ដើម្បីការពាររដ្ឋាភិបាលដែលមានរយៈពេលខ្លី និងមិនមានស្ថិរភាពជាបន្តបន្ទាប់ ដែលដើរតួនាទីយ៉ាងសំខាន់ក្នុងការជួយពួកណាស៊ីឡើងកាន់អំណាច ក្នុងទសវត្សរ៍ឆ្នាំ១៩៣០ មានន័យថា ផ្លូវទៅកាន់ការបោះឆ្នោតថ្មី គឺវែងឆ្ងាយ ហើយភាគច្រើនត្រូវបានគ្រប់គ្រងដោយអធិការបតី។

បន្ទាប់ពីមានការស្នើញ្ញត្តិ លោក Scholz បានប្រាប់អ្នកសារព័ត៌មានកាលពីថ្ងៃពុធកណ្ដាលសប្ដាហ៍មុនថា៖ «ប្រសិនបើសមាជិកសភាដើរតាមមាគ៌ាដែលខ្ញុំកំពុងផ្ដល់ជូន ខ្ញុំនឹងស្នើទៅប្រធានាធិបតីឲ្យរំលាយរដ្ឋសភា»។

ប្រធានាធិបតី លោក Frank-Walter Steinmeier បាននិយាយថា លោកនឹងចាត់វិធានការតាមក្រោយការបោះឆ្នោត នៅថ្ងៃចន្ទ និងបានយល់ព្រមជាមួយគណបក្ស នៅសភាថា ថ្ងៃទី 23 ខែកុម្ភៈ គឺជាកាលបរិច្ឆេទសម្រាប់ការបោះឆ្នោតមុនកាលកំណត់។

ដោយសន្មត់ថា ការបោះឆ្នោតដកសេចក្ដីទុកចិត្តទទួលបានការអនុម័ត លោក Scholz និងរដ្ឋមន្ត្រីរបស់លោក នឹងបន្តកាន់តំណែងក្នុងសមត្ថភាពស្ដីទី រហូតដល់រដ្ឋាភិបាលថ្មីត្រូវបានបង្កើតឡើង ដែលអាចចំណាយពេលច្រើនខែ ប្រសិនបើការចរចារបស់ក្រុមចម្រុះមានរយៈពេលវែង៕