នាយករដ្ឋមន្ត្រីអ៊ីស្រាអែល លោក បេនចាមីន ណេតាន់យ៉ាហ៊ូ (Benjamin Netanyahu) បាននិយាយថា អ៊ីស្រាអែល មិនចាប់អារម្មណ៍ចំពោះការប្រឈមមុខដាក់គ្នាណាមួយ ជាមួយស៊ីរីទេ ហើយនឹងកសាងគោលនយោបាយរបស់ខ្លួនចំពោះទីក្រុងដាម៉ាស (Damascus )ដោយផ្អែកលើស្ថានភាពជាក់ស្តែង។

ការិយាល័យរបស់លោក បានដកស្រង់សម្តីលោកដែលបានបញ្ជាក់ថា៖«យើងមិនមានចំណាប់អារម្មណ៍ក្នុងជម្លោះជាមួយស៊ីរីទេ»។ «យើងនឹងកំណត់គោលនយោបាយរបស់អ៊ីស្រាអែលចំពោះប្រទេសស៊ីរី យោងទៅតាមការពិត ដែលកំពុងកើតឡើងជាក់ស្តែង»។

លោកបានរំឭកថា ស៊ីរីជាសត្រូវរបស់អ៊ីស្រាអែលអស់ជាច្រើនទសវត្សរ៍មកហើយ ដោយវាយប្រហារអ៊ី   ស្រាអែល ឬបណ្តោយឲ្យអ្នកដទៃវាយប្រហារអ៊ីស្រាអែលពីទឹកដីខ្លួន។ ក្រៅពីនោះ ខ្លួនបានអនុញ្ញាតឲ្យ   អ៊ីរ៉ង់  បំពាក់អាវុធដល់ក្រុមហេសបូឡា តាមរយៈទឹកដីរបស់ខ្លួន។

លោក បានថ្លែងថា៖«ដើម្បីធានាថា រឿងនេះ មិនកើតឡើងដដែលៗនោះ យើងបានចាត់វិធានការយ៉ាងយកចិត្តទុកដាក់ ក្នុងរយៈពេលប៉ុន្មានថ្ងៃថ្មីៗនេះ។ រួមជាមួយរដ្ឋមន្ត្រីការពារជាតិ លោក Katz ខ្ញុំបានដឹកនាំកងកម្លាំងការពារអ៊ីស្រាអែល (IDF) ដើម្បីទប់ស្កាត់ការគំរាមកំហែង ដែលអាចកើតមានពីប្រទេសស៊ីរី និងរារាំងក្រុមភេរវករពីការគ្រប់គ្រង នៅជិតព្រំដែនរបស់យើង»។ «រយៈពេលប៉ុន្មានថ្ងៃកន្លងទៅនេះ យើងបានបំផ្លាញសមត្ថភាព ដែល [អតីតប្រធានាធិបតីស៊ីរី] របបលោក អាសាដ បានចំណាយពេលជាច្រើនទសវត្សរ៍ ដើម្បីកសាង»។