នាយករដ្ឋមន្ត្រីម៉ាឡេស៊ី លោក Anwar Ibrahim នៅថ្ងៃចន្ទ (ទី១៦ ខែធ្នូ) នេះ បានតែងតាំងអ្នកនយោបាយជើងចាស់ និងជាអតីតនាយករដ្ឋមន្ត្រីរបស់ប្រទេសថៃ គឺលោកមហាសេដ្ឋី ថាក់ស៊ីន ស៊ីណាវ៉ាត់ ជាទីប្រឹក្សាផ្ទាល់របស់លោក នៅពេលដែលលោកក្លាយជាប្រធានប្លុកនៃតំបន់អាស៊ីអាគ្នេយ៍ នាឆ្នាំក្រោយ៕

លោក Anwar បានប្រាប់ឲ្យដឹងថា តួនាទីរបស់លោក ថាក់ស៊ីន ក្នុងអំឡុងពេលលោកធ្វើជាប្រមុខដឹកនាំសមាគមប្រជាជាតិអាស៊ីអាគ្នេយ៍ ឬអាស៊ាន នឹងស្ថិតក្នុងសមត្ថភាពក្រៅផ្លូវការ រួមជាមួយនឹងទីប្រឹក្សាមកពីប្រទេសមួយចំនួន ក្នុងចំណោមរដ្ឋសមាជិកទាំង ១០ របស់ប្លុកនេះ។

លោក Anwar បានធ្វើសេចក្តីប្រកាសនេះ អំឡុងដំណើរទស្សនកិច្ចទៅកាន់ប្រទេសម៉ាឡេស៊ីរបស់នាយករដ្ឋមន្ត្រី គឺលោកស្រី Paetongtarn Shinawatra (ផែថងថាន ស៊ីណាវ៉ាត់) ដែលជាកូនស្រីពៅរបស់លោក ថាក់ស៊ីន និងជាសមាជិកទី៤ នៃគ្រួសារស៊ីណាវ៉ាត់ ដែលបានកាន់មុខតំណែងនយោបាយកំពូលរបស់ប្រទេសថៃ។

នៅឯសន្និសីទសារព័ត៌មានរួមជាមួយលោកស្រី ផែថងថាន លោក Anwar បាននិយាយអំពីលោក ថាក់ស៊ីន ថា៖ «សូមអរគុណចំពោះការយល់ព្រម ចំពោះរឿងនេះ ព្រោះយើងត្រូវការបានប្រយោជន៍ពីបទពិសោធន៍របស់រដ្ឋបុរសបែបនេះ»។

លោក ថាក់ស៊ីន វ័យ ៧៥ឆ្នាំ គឺជាឥស្សរជនដ៏លេចធ្លោលើនយោបាយថៃ ក្នុងរយៈពេល ២ទសវត្សរ៍ចុងក្រោយនេះ ហើយគេរំពឹងយ៉ាងទូលំទូលាយថា លោកមានឥទ្ធិពលដល់ការបង្កើតរដ្ឋាភិបាលបច្ចុប្បន្ន ដោយសារឃើញមានការគ្រប់គ្រងជាច្រើន ក្នុងរយៈពេល ២៥ឆ្នាំចុងក្រោយនេះ។ 

គួរបញ្ជាក់ថា លោក ថាក់ស៊ីន ត្រូវបានរារាំងមិនឲ្យចូលកាន់តំណែង ក្នុងប្រទេស បន្ទាប់ពីត្រូវបានរកឃើញថា មានទោសពីបទរំលោភអំណាច និងទំនាស់ផលប្រយោជន៍ ជាការចោទប្រកាន់ ដែលលោកត្រូវគេចខ្លួនអស់រយៈពេល ១៥ឆ្នាំ ដោយរស់នៅនិរទេសខ្លួន ខណៈដែលលោកនៅតែជាតួអង្គដ៏សំខាន់នៅក្នុងភាពចលាចលជាបន្តបន្ទាប់ឥតដាច់ ពេលវិលមកកាន់ប្រទេសវិញ៕