កងកម្លាំងការពារអ៊ីស្រាអែល (IDF) បាននិយាយថា អ៊ីស្រាអែល បានធ្វើការវាយប្រហារតាមអាកាសទៅលើមជ្ឈមណ្ឌលបញ្ជារបស់ក្រុមសកម្មប្រយុទ្ធជីហាដឥស្លាម ហាម៉ាស និងក្រុមជីហាដ នៅក្នុងជំរំជនភៀសខ្លួន Nuseirat នៅភាគកណ្តាលតំបន់ហ្កាហ្សាស្ទ្រីប។

«កាលពីព្រឹកថ្ងៃអាទិត្យ ដោយមានការណែនាំពីកងកម្លាំងការពារអ៊ីស្រាអែល ( IDF) និង ទីភ្នាក់ងារសន្តិសុខអ៊ីស្រាអែល ( ISA ) កងទ័ពអាកាសអ៊ីស្រាអែល (IAF) បានធ្វើការវាយប្រហារយ៉ាងជាក់លាក់មួយ ទៅលើក្រុមហាម៉ាស និងភេរវករជីហាដឥស្លាម ដែលកំពុងប្រតិបត្តិការនៅក្នុងមជ្ឈមណ្ឌលបញ្ជា និងគ្រប់គ្រង ដែលបានបង្កប់ នៅក្នុងការិយាល័យរបស់អង្គការ «ការពារជនស៊ីវិល» ក្នុងជំរំNuseirat»។ «មជ្ឈមណ្ឌលបញ្ជា និងគ្រប់គ្រងនេះ ត្រូវបានប្រើប្រាស់ដោយក្រុមភេរវករ ដើម្បីរៀបចំផែនការ និងធ្វើការវាយប្រហារភេរវកម្ម ប្រឆាំងនឹងកងទ័ព IDF»។

IDF បានបន្ថែមថា៖«ក្នុងចំណោមភេរវករដែលត្រូវបានសម្លាប់ នៅក្នុងការវាយប្រហារនោះ គឺក្រុមភេរវករ ជីហាដឥស្លាម Ahmed Bakr al-Lawh ដែលពីមុនបានបម្រើការជាមេបញ្ជាការកងអនុសេនាតូច នៅក្នុងកងពលតូចជំរំកណ្តាលរបស់ឥស្លាមជីហាដ»។

ប៉ុស្តិ៍ទូរទស្សន៍ Al Jazeera បានរាយការណ៍នៅព្រឹកថ្ងៃដដែលថា អ្នកថតរូបរបស់ខ្លួន បានស្លាប់ បន្ទាប់ពីការវាយប្រហារតាមអាកាសរបស់អ៊ីស្រាអែល លើតំបន់ហ្កាហ្សាស្ទ្រីប នៅពេលដែលគាត់ កំពុងធ្វើការនៅក្នុងជំរំ Nuseirat ។ ប៉ុស្តិ៍ទូរទស្សន៍នេះបានឲ្យដឹងថា បុគ្គលិកសេវារបស់អង្គការការពារជនស៊ីវិលចំនួន ៥នាក់ ក៏ត្រូវបានសម្លាប់ នៅក្នុងការវាយប្រហារនោះ ផងដែរ។