អគ្គលេខាធិការរងទទួលបន្ទុកកិច្ចការមនុស្សធម៌របស់អង្គការសហប្រជាជាតិ(UN)លោក Thomas Fletcher បានធ្វើដំណើរទៅដល់ទីក្រុងដាម៉ាស់នៅថ្ងៃចន្ទនេះ ជាទីដែលលោករំពឹងថានឹងជួបជាមួយក្រុមមន្រ្តីរបស់ឧទ្ទាម Hayat Tahrir al-Sham ដែលបានទម្លាក់របបផ្តាច់ការរបស់លោកប្រធានាធិបតី Bashar al-Assad ។

លោកបាននិយាយប្រាប់ក្រុមអ្នកសារព័ត៌មានពេលមកដល់ថា ពួកយើងចង់បានលំហូរទ្រង់ទ្រាយធំការគាំទ្រទៅកាន់ស៊ីរី ឲ្យបានលឿនបំផុត ទាំងស្បៀងអាហារ ឱសថ ជម្រក ប៉ុន្តែមូលនិធិផងដែរ ដើម្បីអភិវឌ្ឍប្រទេសស៊ីរីឡើងវិញដែលធ្វើឲ្យពលរដ្ឋមានជំនឿម្តងទៀត ។

រដ្ឋបាលថ្មីនៅក្នុងទីក្រុងដាម៉ាស់ បានកំណត់រឿងរ៉ាវលម្អិតតិចតួចប៉ុណ្ណោះលើការគិតគូររបស់ពួកគេសម្រាប់ដំណាក់កាលបន្ទាប់នៅស៊ីរី ដែលទើបងើបចេញពីការគ្រប់គ្រងកណ្តាប់ដៃដែកអស់រយៈពេល ៥ទសវត្សរ៍របស់គ្រួសារលោក Assad និងរយៈពេលជិត ១៤ឆ្នាំនៃសង្រ្គាមស៊ីវិលដ៏ខ្ទេចខ្ទាំ ។

រដ្ឋមន្រ្តីការបរទេសសហរដ្ឋអាមេរិកលោក Antony Blinkenបាននិយាយថា ការផ្លាស់ប្តូរនៅស៊ីរី គួរនាំទៅរកអភិបាលកិច្ចគួរឲ្យទុកចិត្ត រួមបញ្ចូល និងមិនប្រកាន់និកាយសាសនា ស្របតាមសេចក្តីសម្រេចលេខ២២៥៤ របស់ក្រុមប្រឹក្សាសន្តិសុខ UN ។

សេចក្តីសម្រេចដែលបានអនុម័តកាលពីឆ្នាំ ២០១៥នេះ អំពាវនាវឲ្យដំណើរការដឹកនាំដោយស៊ីរី សម្របសម្រួលដោយ UN បង្កើតឡើងក្នុងរយៈពេល ៦ខែនូវអភិបាលមិនប្រកាន់និកាយសាសនា និងកំណត់កាលបរិច្ឆេតសម្រាប់ដំណើរការធ្វើសេចក្តីស្នើច្បាប់រដ្ឋធម្មនុញ្ញថ្មី ។ វាអំពាវនាវឲ្យមានការបោះឆ្នោតដោយសេរី និងយុត្តិធម៌ផងដែរ ៕