ប្រទេសចិន នៅថ្ងៃចន្ទ (ទី១៦ ខែធ្នូ) នេះ បានឲ្យដឹងថា ផែនការរបស់សហរដ្ឋអាមេរិក ក្នុងការដំឡើងពន្ធលើការនាំចូលរបស់ចិនបន្ថែមទៀតនោះ គឺត្រឹមតែ «ធ្វើឲ្យស្ថានការណ៍កាន់តែអាក្រក់ទៅៗ» ប៉ុណ្ណោះ បន្ទាប់ពីទីក្រុងវ៉ាស៊ីនតោន បានផ្ដោតលើសមាសធាតុបន្ទះសូឡា និងផលិតផលផ្សេងទៀត។

ចំណាត់ការដែលត្រូវបានប្រកាសដោយការិយាល័យតំណាងពាណិជ្ជកម្មអាមេរិក (USTR) បានបញ្ចប់ដំណើរការពិនិត្យឡើងវិញនូវកាតព្វកិច្ចពន្ធគយដែលត្រូវបានដាក់ អំឡុងរដ្ឋបាលដំបូងរបស់ប្រធានាធិបតីជាប់ឆ្នោត លោក Donald Trump។

តំណាងពាណិជ្ជកម្មអាមេរិក លោកស្រី Katherine Tai បាននិយាយថា អត្រា សម្រាប់បន្ទះស្រូបពន្លឺព្រះអាទិត្យ (បន្ទះសូឡា) និងប៉ូលីស៊ីលីកូន (Polysilicon) ត្រូវបានកំណត់ដំឡើងទ្វេដងរហូតដល់ ៥០ភាគរយ នៅក្នុងខែមករា ដោយនេះជាកិច្ចខិតខំប្រឹងប្រែង ដើម្បីទប់ទល់នឹង «គោលនយោបាយ និងការអនុវត្តដែលបង្កគ្រោះថ្នាក់» របស់ប្រទេសចិន។ 

តែយ៉ាងណាក្ដី ពាក់ព័ន្ធនឹងគោលនយោបាយនេះ ប្រទេសចិនបានរិះគន់ខ្លាំងៗ ដោយនិយាយថា ការដំឡើងពន្ធខ្ពស់នេះ គឺ «កាន់តែធ្វើឲ្យស្ថានការណ៍អាក្រក់ទៅៗ» ហើយនឹងត្រឹមតែនាំឲ្យមានផលប៉ះពាល់ដល់ផលប្រយោជន៍របស់អ្នកប្រើប្រាស់អាមេរិកប៉ុណ្ណោះ៕