ប្រជាជននៅលើកោះម៉ាយ៉ត់(Mayotte)កំពុងស្រែកដង្ហើយរកជំនួយក្រោយព្យុះស៊ីក្លូនជីដូ(Chido) ដែលមានល្បឿនខ្យល់ ២២៥គីឡូម៉ែត្រក្នុងមួយម៉ោង បានបំផ្លិចបំផ្លាញដែនដីនៃមហាសមុទ្រឥណ្ឌារបស់ប្រទេសបារាំង។

មនុស្សចាប់ផ្តើមស្លាប់ដោយសារការស្រេកឃ្លាន ព្រោះគ្មានទឹក និងអាហារ បន្ទាប់ពីព្យុះស៊ីក្លូនបានវាយប្រហារដ៏បំផ្លិចបំផ្លាញ ជាទីដែលផ្ទះសម្បែងប្រជាពលរដ្ឋរងការខូចខាត។

ព្យុះស៊ីក្លូន ជីដូ (Chido) ត្រូវបានគេជឿថា ជាព្យុះដ៏មហន្តរាយបំផុត ដែលបានវាយប្រហារលើកោះនេះក្នុងរយៈពេល៩០ ឆ្នាំមិនធ្លាប់មាន ដោយមានទឹករលកកម្ពស់រហូតដល់ ៨ ម៉ែត្រ។

ក្រុមអាជ្ញាធរ និងអ្នកកោះម៉ាយ៉ត់(Mayotte) បាននិយាយថាស្ថានភាពដែលបង្កឡើងដោយព្យុះដ៏អាក្រក់បំផុតក្នុងរយៈពេល៩០ ឆ្នាំ លើទឹកដីនៃមហាសមុទ្រឥណ្ឌារបស់បារាំងនៅពេលនេះ កំពុងបង្កឲ្យមានគ្រោះមហន្តរាយមនុស្សធម៌។

មនុស្សរាប់រយនាក់ត្រូវបានគេបារម្ភថាបានស្លាប់រួចទៅហើយ ខណៈអភិបាលកោះនេះព្រមានថាចំនួនអ្នកស្លាប់ចុងក្រោយអាចឈានដល់ជិតមួយពាន់ ឬច្រើនពាន់នាក់។

ក្រោយព្យុះស៊ីក្លូន គេបានមើលឃើញជើងភ្នំគ្របដណ្ដប់ដោយផ្ទះសម្បែងរាប់រយខ្នងដួលរាបដល់ដី។ ចំនួនអ្នកស្លាប់ និងទំហំនៃការខូចខាត នៅពុំទាន់ដឹងច្បាស់នៅឡើយទេ។

លោកប្រធានាធិបតីបារាំងលោក Emmanuel Macron បាននិយាយថា លោកនឹងធ្វើដំណើរទៅកាន់កោះម៉ាយ៉ត់ នៅក្នុងប៉ុន្មានថ្ងៃខាងមុខនេះ ខណៈលោកបានសន្យាគាំទ្រដល់បងប្អូនជនរួមជាតិ មន្ត្រីរជ្ឋការ និងក្រុមសេវាសង្គ្រោះបន្ទាន់ ដែលបានចូលរួមកិច្ចខិតខំប្រឹងប្រែងជួយសង្គ្រោះ៕