ប្រមុខបញ្ជាការយោធាជាន់ខ្ពស់រុស្ស៊ី បាននិយាយកាលពីថ្ងៃចន្ទ (១៦ ធ្នូ) ថា ទីក្រុងមូស្គូ កំពុងបង្កើនឃ្លាំងអាវុធបាលីស្ទិករបស់ខ្លួនជាមួយនឹងប្រព័ន្ធមីស៊ីលយុទ្ធសាស្ត្រថ្មី រៀបផែនការការបាញ់បង្ហោះ និងអាចបង្កើនការធ្វើតេស្តបាញ់បង្ហោះ ដើម្បីឆ្លើយតបនឹងការគំរាមកំហែងខាងក្រៅដែលកំពុងកើនឡើង។

នៅក្នុងការព្រមានដ៏ច្បាស់មួយដែលថារុស្ស៊ី នឹងឆ្លើយតប ប្រសិនបើខ្លួនយល់ថាសន្តិសុខត្រូវបានគំរាមកំហែងនោះ លោក សើហ្កេ ការ៉ាកាយ៉េវ (Sergei Karakayev) មេបញ្ជាការកងកម្លាំងមីស៊ីលយុទ្ធសាស្ត្រ បាននិយាយថា រុស្ស៊ីគ្រោងនឹងបាញ់សាកល្បងសព្វាវុធរយៈចម្ងាយអតិបរមា ជាផ្នែកមួយនៃការសាកល្បងប្រព័ន្ធថ្មី ដោយព្រមានថា "បើនិយាយពីរយៈចម្ងាយវិញ ពុំមានកន្លែងណាដែលមីស៊ីលរុស្ស៊ី មិនអាចទៅដល់នោះទេ"។

ដោយបញ្ជាក់ជាសាធារណៈលើកដំបូងថា ទីក្រុងមូស្គូកំពុងអភិវឌ្ឍប្រព័ន្ធមីស៊ីលបាលីស្ទិកអន្តរទ្វីប ICBM ថ្មី ឈ្មោះថា អូស៊ីណា (Osina) លោក Karakayev សង្កត់ធ្ងន់ថា ការដាក់បញ្ចូល Osina ទៅក្នុងសមរភូមិ និងប្រព័ន្ធថ្មីមួយចំនួនទៀតគឺជាអាទិភាព ហើយទីក្រុងមូស្គូ និងសហរដ្ឋអាមេរិក បន្តផ្តល់ការព្រមានឱ្យគ្នាទៅវិញទៅមកក្នុងពេល ២៤ម៉ោង អំពីគម្រោងបាញ់សាកល្បងមីស៊ីល ICBM និងមីស៊ីលបាលីស្ទិកបាញ់ចេញពីនាវាមុជទឹក។

គួររម្លឹកថា រុស្ស៊ីបានវាយប្រហារអ៊ុយក្រែន ក្នុងខែវិច្ឆិកា ជាមួយមីស៊ីល អូរ៉េស្នីក (Oreshnik) ក្នុងការឆ្លើយតបដែលទីក្រុងគីវ ប្រើមីស៊ីលអាមេរិក និងអង់គ្លេស ប្រឆាំងនឹងរុស្ស៊ី៕