ប្រមុខអង្គការសុខភាពពិភពលោក WHO បាននិយាយកាលពីថ្ងៃចន្ទ (១៦ ធ្នូ) ថា ទីបំផុតក្រុមការងារមនុស្សធម៌បានទៅដល់មន្ទីរពេទ្យមួយក្នុងចំណោមមន្ទីរពេទ្យដែលណើរការតែមួយគត់នៅភាគខាងជើងតំបន់ហ្កាហ្សា កាលពីចុងសប្តាហ៍នេះដើម្បីចែកចាយប្រេងឥន្ធនៈ អាហារ និងឱសថ ហើយបានមើលឃើញស្ថានភាព "ដ៏គួរឱ្យរន្ធត់តក់ស្លុត" យ៉ាងខ្លាំងនៅទីនោះ។

មន្ទីរពេទ្យ កាលម៉ាល់ អាដវ៉ាន់ (Kamal Adwan) មានទីតាំងនៅតំបន់ បេតឡាហ៊ីយ៉ា (Beit Lahia) ជាទីក្រុងមួយនៅចំកណ្តាលនៃប្រតិបត្តិការយោធាអ៊ីស្រាអែលដ៏ខ្លាំងក្លា ក្នុងគោលបំណងរារាំងក្រុមហាម៉ាស មិនឱ្យប្រមូលផ្តុំគ្នាឡើងវិញនៅភាគខាងជើងដែនដីហ្កាហ្សា។

ប្រធានអង្គការ WHO លោក Tedros Adhanom Ghebreyesus បានបង្ហោះលើបណ្ដាញសង្គម X ថា៖ បន្ទាប់ពីការប៉ុនប៉ងជាច្រើនដង ទីភ្នាក់ងារសុខភាព UN និងដៃគូ បានទៅដល់មន្ទីរពេទ្យនោះ "កាលពីប៉ុន្មានថ្ងៃមុន ស្របពេលការបំផ្ទុះគ្រាប់បែកនៅតំបន់ជុំវិញមន្ទីរពេទ្យ អំឡុងពេលបេសកកម្ម" ដោយបន្ថែមថា កិច្ចប្រឹងប្រែងផ្តល់ជំនួយចាំបាច់ ត្រូវបានរារាំងម្តងហើយម្តងទៀត។

នៅដើមខែធ្នូនេះ WHO បានលើកឡើងថា ក្រុមបេសកកម្មរបស់ខ្លួនស្ថិតក្នុងចំណោមមនុស្សមួយចំនួនធំដែលភៀសខ្លួនចេញពីមន្ទីរពេទ្យ ដោយសារមានអរិភាពខ្លាំងពេកនៅជុំវិញកន្លែងនោះ។

ចាប់តាំងពីការវាយឆ្មក់ឆ្លងព្រំដែនរបស់ក្រុមហាម៉ាសលើអ៊ីស្រាអែល ដែលសម្លាប់មនុស្សប្រមាណ ១.២០០នាក់កាលពីខែតុលា ឆ្នាំមុនមក ប្រតិបត្តិការយោធាសងសឹករបស់អ៊ីស្រាអែល បានសម្លាប់មនុស្សជាង ៤៥.០០០នាក់ នៅហ្កាហ្សា ដែលភាគច្រើនជាជនស៊ីវិល នេះបើយោងតាមតួលេខពីក្រសួងសុខាភិបាលគ្រប់គ្រងដោយក្រុមហាម៉ាស ដែលអង្គការសហប្រជាជាតិចាត់ទុកថាអាចទុកចិត្តបាន៕