ក្រុមមន្ត្រីឲ្យដឹងនៅថ្ងៃអង្គារនេះថា ក្រុមរជ្ឋអាជ្ញាបានស្នើជាថ្មីម្តងទៀតឱ្យប្រធានាធិបតីដែលត្រូវបានចោទប្រកាន់ទម្លាក់តំណែងរួចលោក Yoon Suk Yeol បង្ហាញខ្លួនដើម្បីការសាកសួរលើបទចោទប្រកាន់ពីបទបះបោរ និងការរំលោភបំពានអំណាចជុំវិញការដាក់ច្បាប់អាជ្ញាសឹក ដែលបរាជ័យរបស់លោក។

រដ្ឋអាជ្ញាបាននិយាយថា ប្រសិនបើលោក Yoon ខកខានបង្ហាញខ្លួនសម្រាប់ការសាកសួរនៅថ្ងៃសៅរ៍សប្ដាហ៍នេះ ពួកគេនឹងពិចារណាស្វែងរកដីកាចាប់ខ្លួន។

ដោយសារលោកYoon មិនបានគោរពតាមការកោះហៅលើកទីមួយដែលបានចេញ គេនៅតែមិនប្រាកដថាតើរូបលោកនឹងឆ្លើយតបចំពោះការកោះហៅលើកទីពីរឬអត់នោះទេ។

រដ្ឋអាជ្ញាបានចាត់ទុកលោក Yoon ជាបុគ្គលសំខាន់ ដែលទទួលខុសត្រូវចំពោះការដាក់ច្បាប់អាជ្ញាសឹកកាលពីថ្ងៃទី៣ខែធ្នូ ដោយជឿថាសកម្មភាពរបស់លោកលើសពីភារកិច្ចប្រធានាធិបតីដែលអនុញ្ញាតដោយរដ្ឋធម្មនុញ្ញ និងច្បាប់ផ្សេងទៀត។

ប្រសិនបើលោកឆ្លើយតបនឹងការកោះហៅ នោះនឹងក្លាយជាលើកដំបូងក្នុងប្រវត្តិសាស្ត្រដែលប្រធានាធិបតីក្នុងតំណែងបង្ហាញខ្លួននៅចំពោះមុខរដ្ឋអាជ្ញាក្នុងនាមជាជនសង្ស័យ។

ដោយឡែក ក្រុមស៊ើបអង្កេតចម្រុះរបស់នគរបាល ការិយាល័យស៊ើបអង្កេតអំពើពុករលួយសម្រាប់មន្ត្រីជាន់ខ្ពស់ និងអង្គភាពស៊ើបអង្កេតរបស់ក្រសួងការពារជាតិ ក៏បានស្នើសុំឱ្យលោក Yoon បង្ហាញខ្លួនដើម្បីសាកសួរនៅថ្ងៃពុធសប្ដាហ៍នេះ ផងដែរ៕