មន្ទីរបញ្ចកោណ បាននិយាយកាលពីថ្ងៃចន្ទ (១៦ ធ្នូ) ថា កងទ័ពកូរ៉េខាងជើង បានចូលរួមការប្រយុទ្ធជាមួយកងកម្លាំងរុស្ស៊ី នៅតំបន់ឃើស (Kursk) ជាលើកដំបូង ប្រឆាំងនឹងអ៊ុយក្រែន ហើយទីក្រុងវ៉ាស៊ីនតោន មានការចង្អុលបង្ហាញថា ទាហានកូរ៉េខាងជើងជាច្រើន បានស្លាប់ និងរងរបួស។

អ្នកនាំពាក្យមន្ទីរបញ្ចកោណ លោក Patrick Ryder បានប្រាប់អ្នកសារព័ត៌មានថា "យើងវាយតម្លៃថា ទាហានកូរ៉េខាងជើង បានចូលរួមក្នុងការប្រយុទ្ធនៅតំបន់ Kursk ហើយក៏មានការចង្អុលបង្ហាញថា ពួកគេបានរងគ្រោះធ្ងន់ធ្ងរ ដែលមានទាំងអ្នកស្លាប់ និងរបួសជាច្រើន"។

លោក Ryder បន្ថែមថា លោកមិនអាចឱ្យព័ត៌មានលម្អិតពីចំនួនអ្នកស្លាប់ និងរបួសរបស់កូរ៉េខាងជើងទេ ប៉ុន្តែអាចបញ្ជាក់បានថា ទាហានទីក្រុងព្យុងយ៉ាង បានចូលប្រយុទ្ធកាលពីសប្តាហ៍មុន។

អ៊ុយក្រែន បាននិយាយកាលពីថ្ងៃចន្ទថា អង្គភាពកូរ៉េខាងជើង ដែលកំពុងប្រយុទ្ធរួមគ្នានឹងរុស្ស៊ី មានទាហានយ៉ាងហោចណាស់ ៣០នាក់ ដែលស្លាប់ ឬរបួស នៅជុំវិញភូមិជាច្រើននៅជួរមុខក្នុងតំបន់ Kursk របស់រុស្ស៊ី កាលពីចុងសប្តាហ៍។

សេចក្តីថ្លែងការណ៍របស់ទីភ្នាក់ងារចារកម្មយោធាអ៊ុយក្រែននោះ បានធ្វើឡើងបន្ទាប់ពីលោកប្រធានាធិបតី Volodymyr Zelenskiy បាននិយាយកាលពីថ្ងៃសៅរ៍សប្ដាហ៍មុនថា រុស្ស៊ីកំពុងប្រើប្រាស់កងទ័ពកូរ៉េខាងជើង ក្នុងចំនួនដ៏ច្រើនជាលើកដំបូង ដើម្បីវាយបកនៅតំបន់ Kursk ដែលអ៊ុយក្រែន បានបើកការវាយលុកឆ្លងព្រំដែនកាលពីខែសីហា៕