រដ្ឋមន្ត្រីការពារជាតិរុស្ស៊ី បាននិយាយកាលពីថ្ងៃចន្ទ (១៦ ធ្នូ) ថា ទីក្រុងមូស្គូ ត្រូវតែត្រៀមខ្លួនឱ្យស្រេចដើម្បីប្រយុទ្ធជាមួយសម្ព័ន្ធមិត្តយោធាណាតូ នៅអឺរ៉ុប ក្នុងទសវត្សរ៍ក្រោយនេះ ខណៈលោកប្រធានាធិបតី វ្ល៉ាឌីមៀ ពូទីន (Vladimir Putin) បានលើកឡើងថា លោកជឿថាជ័យជម្នះក្នុងសង្រ្គាមអ៊ុយក្រែន កំពុងងាកមកខាងទីក្រុងមូស្គូ ហើយ។

លោក អាន់ឌ្រី បេលូសូវ (Andrei Belousov) ប្រមុខការពារជាតិរបស់លោក ពូទីន បានលើកឡើងពីកិច្ចប្រជុំកំពូលរបស់អង្គការណាតូ ក្នុងខែកក្កដា និងគោលលទ្ធិយោធានៅសហរដ្ឋអាមេរិក រួមទាំងសមាជិកណាតូផ្សេងទៀត ថាជាភស្តុតាងដែលបង្ហាញថា ទីក្រុងមូស្គូ ត្រូវតែត្រៀមរៀបចំសម្រាប់ជម្លោះដោយផ្ទាល់ជាមួយសម្ព័ន្ធយោធាណាតូ ដែលកាន់តែក្រអឺតក្រទម នៅក្នុងប៉ុន្មានឆ្នាំខាងមុខនេះ។

លោក Belousov បានដាក់ចេញនូវការផ្លាស់ប្តូរ និងកំណែទម្រង់ជាច្រើន ដែលលោកនិយាយថាចាំបាច់ ដោយ "គិតគូរពីប្រភពនៃជម្លោះយោធានាពេលអនាគត"។

លោកបានលើកឡើងពីផែនការរបស់អាមេរិក ក្នុងការធ្វើទំនើបកម្មកងកម្លាំងនុយក្លេអ៊ែររបស់ខ្លួន ការបើកមូលដ្ឋានការពារមីស៊ីលអាមេរិក នៅប៉ូឡូញ ផែនការត្រៀមប្រយុទ្ធថ្មីរបស់អង្គការណាតូ និងផែនការដែលបានប្រកាសនៅក្នុងកិច្ចប្រជុំកំពូលណាតូ នៃការដាក់ពង្រាយមីស៊ីលរយៈចម្ងាយមធ្យមរបស់អាមេរិក នៅអាល្លឺម៉ង់ ក្នុងឆ្នាំ២០២៦។

ជាមួយគ្នានេះ លោក ពូទីន បានចោទលោកខាងលិចថាបានរុញរុស្ស៊ី ទៅដល់ "បន្ទាត់ក្រហម" របស់ខ្លួន - ជាស្ថានភាពដែលទីក្រុងមូស្គូបញ្ជាក់ជាសាធារណៈថាខ្លួននឹងមិនអត់ធ្មត់ទេ - ហើយបានព្រមានថា ទីក្រុងមូស្គូ ត្រូវបានបង្ខំឱ្យឆ្លើយតបទៅនឹងអនុត្តរភាពរបស់លោកខាងលិច៕