ចិន៖ អ្នកទេសចរដែលជាប់នៅក្នុងទីក្រុងព្រំដែននៅភាគខាងជើងប្រទេសចិន បន្ទាប់ពីទីក្រុងនេះបានដាក់វិធានការបិទខ្ទប់ដើម្បីគ្រប់គ្រងការផ្ទុះឡើងថ្មីនៃករណីឆ្លងវីរុស ត្រូវបានអនុញ្ញាតឱ្យចាកចេញក្នុងសប្ដាហ៍នេះ។ តំបន់អ៊ីជីនបានន័រ នៅក្នុងតំបន់អ៊ីនន័រម៉ុងហ្គោលី ប្រទេសចិនភាគខាងជើងបានរងការវាយប្រហារខ្លាំង ដោយករណីឆ្លងវីរុសជាចង្កោមរបស់ប្រទេសចិនក្នុងសប្តាហ៍កន្លងទៅនេះ។
ទីក្រុងនេះបានរារាំងអ្នកទេសចរមិនឱ្យចាកចេញពីទីក្រុងកាលពីថ្ងៃចន្ទសប្ដាហ៍មុន បន្ទាប់ពីអ្នកទេសចរ ២នាក់ដែលបានមកទស្សនាទីក្រុងនេះក្រោយមកបានធ្វើតេស្តវិជ្ជមានវីរុសកូរ៉ូណា។ តំបន់អ៊ីជីនបានន័រមានភាពល្បីល្បាញដោយសារទេសភាពនៅរដូវស្លឹកឈើជ្រុះ ទាក់ទាញក្រុមភ្ញៀវទេសចរធំៗជារៀងរាល់ឆ្នាំ។ ទូរទស្សន៍រដ្ឋ CCTV បានរាយការណ៍ថា អ្នកធ្វើដំណើរជាង ៩,៤០០នាក់បានជាប់គាំងនៅក្នុងទីក្រុង ហើយជិតពាក់កណ្តាលមានអាយុលើសពី ៦០ឆ្នាំ។ ពួកគេត្រូវបានស្នើសុំឱ្យស្នាក់នៅក្នុងសហគមន៍លំនៅដ្ឋាន និងសណ្ឋាគារក្នុងតំបន់ដែលមានបុគ្គលិកសង្កាត់ជួយពួកគេបំពេញតម្រូវការផ្គត់ផ្គង់ផ្សេងៗ។ ចាប់តាំងពីថ្ងៃពុធរដ្ឋាភិបាលក្នុងតំបន់បានចាប់ផ្តើមផ្ទេរអ្នកទេសចរ ទៅកាន់ទីក្រុងដែលមានហានិភ័យទាបនៅក្បែរនោះ ដែលពួកគេនឹងត្រូវឆ្លងកាត់ការដាក់ឱ្យធ្វើចត្តាឡីស័ករយៈពេល ១៤ថ្ងៃ។ ក្រុមមន្ត្រីបាននិយាយថា អ្នកធ្វើដំណើរនឹងត្រូវបានអនុញ្ញាតឱ្យចាកចេញទៅលំនៅដ្ឋានវិញ នៅពេលដែលពួកគេបំពេញតាមលក្ខណៈវិនិច្ឆ័យសុខភាពនៅចុងបញ្ចប់នៃការដាក់ឱ្យធ្វើចត្តាឡីស័ក៕
អត្ថបទ៖ ប៊ុនថន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
