កាលពីថ្ងៃច័ន្ទ ទី១៦ ខែធ្នូ មនុស្សជាច្រើនមកពីក្រុម «Riseup 4Rojava» បានធ្វើបាតុកម្មនៅទីតាំងប្រវត្តិសាស្ត្រ Brandenburg Gate ក្នុងទីក្រុងប៊ែកឡាំង។ ក្រុម Rojava គឺជាឈ្មោះជនជាតិឃឺដសម្រាប់រដ្ឋបាលស្វយ័តនៅប្រទេសស៊ីរីខាងជើង និងខាងកើត។

ក្រុមអ្នកតវ៉ា បានឡើងលើទីតាំងប្រវត្តិសាស្ត្រ Brandenburg gate និងបានលើកបដាដែលមានអំណានថា «ដើម្បីលទ្ធិប្រជាធិបតេយ្យនៅស៊ីរី / ការពារក្រុម Rojava»។

ក្រុមនេះបានប្រកាសថា ពួកគេទាមទារឱ្យប្រទេសអាល្លឺម៉ង់ បញ្ឈប់ការផ្គត់ផ្គង់អាវុធដល់ប្រទេសទួរគី ជាអ្នកគាំទ្រក្រុមឧទ្ទាមដែលបានប៉ះទង្គិចជាមួយក្រុមឧទ្ទាមឃឺដ។ ក្រុមនេះក៏បានអំពាវនាវឱ្យរដ្ឋាភិបាលអាល្លឺម៉ង់ ទទួលស្គាល់ រដ្ឋបាលស្វយ័តនៅប្រទេសស៊ីរីខាងជើង និងខាងកើតផងដែរ។

ដោយឈរនៅលើកំពូលនៃទីតាំងប្រវត្តិសាស្ត្រ Brandenburg Gate សកម្មជនបាននិយាយថា «យើងជឿជាក់ថា ការទាមទារទាំងនេះគឺចាំបាច់ដើម្បីធានាឱ្យមានលទ្ធិប្រជាធិបតេយ្យនៅស៊ីរី» ។

នគរបាល បានឲ្យក្រុមបាតុករចុះពីលើអគារ កំណត់អត្តសញ្ញាណ និងចាប់ផ្តើមការស៊ើបអង្កេតពីបទរំលោភចូលតំបន់ហាមឃាត់ និងធ្វើឱ្យខូចខាតសម្បត្តិសាធារណៈ។

ដោយរដ្ឋាភិបាលស៊ីរីបច្ចុប្បន្ន កំពុងស្ថិតក្នុងដំណាក់កាលអន្តរកាល ក្រុម Hayat Tahrir al-Sham (HTS) គឺជាក្រុមអ៊ីស្លាមនិយម បានបង្ហាញខ្លួននៅទីក្រុងដាម៉ាស ចាប់តាំងពីការផ្តួលរំលំ លោក Bashar al-Assad។

ក្រុមឧទ្ទាមគាំទ្រដោយទួរគី នៅស៊ីរីភាគខាងជើង បានប៉ះទង្គិចជាមួយកងកម្លាំងប្រជាធិបតេយ្យស៊ីរី (SDF) ដឹកនាំដោយក្រុមឃឺដ។ កងកម្លាំងប្រជាធិបតេយ្យស៊ីរី (SDF) ដែលគ្រប់គ្រងតំបន់វាលប្រេងធំៗមួយចំនួននៅប្រទេសស៊ីរី គឺជាសម្ព័ន្ធមិត្តដ៏សំខាន់នៅក្នុងក្រុមចម្រុះរបស់សហរដ្ឋអាមេរិក ប្រឆាំងក្រុមសកម្មប្រយុទ្ធរដ្ឋអ៊ីស្លាម។