ការបាញ់ប្រហារនៅសាលារៀនគ្រឹស្តសាសនាមួយកន្លែងក្នុងទីក្រុង Madison រដ្ឋ Wisconsin សហរដ្ឋអាមេរិក កាលពីថ្ងៃច័ន្ទ បានបណ្តាលឲ្យសិស្សជំទង់ម្នាក់ និងគ្រូបង្រៀនម្នាក់ស្លាប់ និងជាច្រើននាក់ទៀតរងរបួស ដែលធ្វើឲ្យសហគមន៍សាសនាតូចមួយនេះកាន់ទុក្ខ នៅប៉ុន្មានថ្ងៃមុនពេលសាលារៀននឹងត្រូវបិទសម្រាប់បុណ្យណូអែល។

ប្រភពពីអាជ្ញាធរបាននិយាយ ថា ជនសង្ស័យជាក្មេងស្រីជំទង់អាយុ ១៧ ឆ្នាំ ហើយត្រូវបានគេជឿថា បានសម្លាប់ខ្លួនឯងដោយកាំភ្លើង។

អង្គភាពនគរបាលទីក្រុង Madison បាននិយាយនៅលើបណ្តាញសង្គមថា ការបាញ់ប្រហារ បានកើតឡើងនៅសាលារៀនគ្រឹស្តសាសនាមួយកន្លែង ជាគ្រឹះស្ថានឯកជន ដែលបង្រៀនសិស្សប្រមាណ ៤០០ នាក់ មានចាប់ពីថ្នាក់មត្តេយ្យ ដល់ថ្នាក់ទី ១២។

នគរបាលរដ្ឋ Wisconsin បានបន្ថយចំនួនអ្នកស្លាប់មកនៅត្រឹម៣នាក់ រួមទាំងអ្នកបាញ់ប្រហារ ពីចំនួន៥នាក់ ដែលបានរាយការណ៍លើកដំបូង។

វីដេអូ ពីកន្លែងកើតហេតុ បានបង្ហាញពីការឆ្លើយតបបន្ទាន់ទ្រង់ទ្រាយធំមួយ រួមមានទាំងនគរបាល រថយន្តសង្គ្រោះ និងរថយន្តពន្លត់អគ្គីភ័យ។

យោងតាមគេហទំព័រទិន្នន័យពីការបាញ់ប្រហារនៅតាមសាលារៀន K-12 បានឱ្យដឹងថា ឆ្នាំនេះ មានការបាញ់ប្រហារនៅសាលារៀនចំនួន៣២២កន្លែង ក្នុងសហរដ្ឋអាមេរិក។ នោះគឺជាចំនួនសរុបខ្ពស់បំផុតទីពីរ ចាប់តាំងពីឆ្នាំ១៩៦៦ ។

អ្នកបាញ់ប្រហារ ត្រូវបានគេរកឃើញស្លាប់នៅក្នុងសាលារៀននៅពេលនគរបាលទៅដល់។ នគរបាលបាននិយាយនៅក្នុងសេចក្តីថ្លែងការណ៍ថា យ៉ាងហោចណាស់មនុស្ស៦នាក់ផ្សេងទៀត ត្រូវបានដឹកចេញពីកន្លែងកើតហេតុ ទៅកាន់មន្ទីរពេទ្យ ក្នុងតំបន់។