សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃកម្ពុជា បានជំរុញលើកទឹកចិត្តដល់​វិស័យ​ឯកជនឱ្យរួមគ្នាជួយអភិវឌ្ឍន៍​តំបន់ភាគខាងកើតដង​ទន្លេមេគង្គ ដើម្បីឱ្យមានការរីកលូតលាស់​ដូចតំបន់ភាគខាងលិច ទន្លេផងដែរ ។

សម្ដេចធិបតី ហ៊ុន ម៉ាណែត នាយករដ្ឋមន្ត្រី​ ក្នុងឱកាសអញ្ជើញ​ជាអធិបតីបើកការដ្ឋាន​សាងសង់​ទីក្រុង មេគង្គឃី របស់ក្រុមហ៊ុន ធីភី ម៉ូរ៉ាល់ គ្រុប ស្ថិតនៅក្រុងអរិយក្សត្រ ​នាព្រឹកថ្ងៃទី១៧ ខែធ្នូ នេះ បានថ្លែងថា ការចូលរួម​អភិវឌ្ឍន៍​តំបន់ភាគខាងកើត​ទន្លេមេគង្គ តាម​រយៈកសាងហេដ្ឋា​រចនា​សម្ព័ន្ធនានា នឹងជួយធ្វើឱ្យតំបន់នេះ ​មានការរីកចម្រើន លើកស្ទួយ​ជីវភាព​ប្រជាពលរដ្ឋ ដើម្បី​ជំរុញតំបន់នេះឱ្យមើលទៅស្រស់ស្អាតដូចតំបន់ខាងលិចដែរ ។

សម្ដេចធិបតី ហ៊ុន ម៉ាណែត បានលើកទឹកចិត្តវិស័យឯកជននានា ជួយជំរុញឱ្យមានការអភិវឌ្ឍរីក ចម្រើនតំបន់ភាគខាងកើត ដែលនឹងលើកកម្ពស់ជីវភាពរស់នៅរបស់ប្រជាពលរដ្ឋ កាត់បន្ថយគម្លាត​សេដ្ឋកិច្ច និង គម្លាតនៃការរស់នៅជាមួយភាគខាងលិច ៕អត្ថបទ៖ នីតា