កងកម្លាំងប្រជាធិបតេយ្យស៊ីរី (SDF) បាននិយាយកាលពីថ្ងៃចន្ទថា កិច្ចខិតខំប្រឹងប្រែងសម្របសម្រួលដឹកនាំដោយសហរដ្ឋអាមេរិក បានបរាជ័យ ក្នុងការបង្កើតបទឈប់បាញ់យូរអង្វែង នៅក្នុងតំបន់ Manbij និង Kobani ភាគខាងជើងប្រទេសស៊ីរី។

នៅក្នុងសេចក្តីថ្លែងការណ៍មួយពីមជ្ឈមណ្ឌលប្រព័ន្ធផ្សព្វផ្សាយរបស់ខ្លួន កងកម្លាំងប្រជាធិបតេយ្យស៊ីរី (SDF) បានចោទប្រកាន់ប្រទេសទួរគី និងកងជីវពលសម្ព័ន្ធមិត្តថា បានច្រានចោលបទប្បញ្ញត្តិសំខាន់ៗនៅក្នុងកិច្ចព្រមព្រៀងដែលបានស្នើឡើង រួមទាំងការបញ្ជូនយុទ្ធជននៃក្រុមប្រឹក្សាយោធាតំបន់ Manbij ដែលនៅសេសសល់ និងជនស៊ីវិលដែលកំពុងស្វែងរកការផ្លាស់ទីលំនៅ ទៅកាន់តំបន់មានសុវត្ថិភាព នៅភាគខាងជើង និងភាគខាងកើតប្រទេសស៊ីរី។

ក្រុមឃ្លាំមើលសិទ្ធិមនុស្សស៊ីរី បានបញ្ជាក់ការអះអាងនោះ ដោយរាយការណ៍ថា ក្រុមដែលគាំទ្រដោយទួរគីបានបដិសេធមិនអនុវត្តលក្ខខណ្ឌនៃកិច្ចព្រមព្រៀងកាត់បន្ថយភាពតានតឹងដែលបានឈានដល់ ជាមួយ កងកម្លាំង SDF ដែលគាំទ្រដោយសហរដ្ឋអាមេរិក។ ក្រុមឃ្លាំមើលសិទ្ធិមនុស្ស បានបន្ថែមថា ក្រុមប្រឆាំងទាំងនេះ កំពុងរារាំងការចូលរបស់អឌ្ឍចន្ទក្រហមឃើដ និងក្បួនរថយន្ត«រដ្ឋបាលស្វយ័ត» ដែលមានបំណងជម្លៀសជនស៊ីវិល អ្នកទោស និងសាកសពរបស់អ្នកស្លាប់។

ស្ថានការណ៍នៅតំបន់ Manbij ដែលជាទីក្រុងសំខាន់ជាយុទ្ធសាស្ត្រ នៅភាគខាងជើងប្រទេសស៊ីរី កាន់តែយ៉ាប់យ៉ឺនយ៉ាងខ្លាំង។ នៅចុងខែវិច្ឆិកា ឆ្នាំ ២០២៤ កងទ័ពជាតិស៊ីរីដែលគាំទ្រដោយទួរគី បានបើកការវាយលុកទ្រង់ទ្រាយមួយប្រឆាំងនឹងទីក្រុងនេះ ដែលស្ថិតនៅក្រោមការគ្រប់គ្រងរបស់កងកម្លាំងSDF។ ការវាយប្រហារនោះ បាននាំឲ្យមានការប៉ះទង្គិចគ្នាយ៉ាងខ្លាំង ការស្លាប់ជនស៊ីវិល និងវិបត្តិមនុស្សធម៌ កាន់ធ្ងន់ធ្ងរឡើង។