ទីភ្នាក់ងារជំនួយនិងការងាររបស់អង្គការសហប្រជាជាតិសម្រាប់ជនភៀសខ្លួនប៉ាឡេស្ទីន នៅតំបន់ដើម   បូព៌ា (UNRWA) បានចេញការព្រមានយ៉ាងខ្លាំងកាលពីថ្ងៃចន្ទ ដោយបង្ហាញពីហានិភ័យធ្ងន់ធ្ងរដល់ទារករាប់ពាន់នាក់ នៅក្នុងតំបន់ហ្កហ្សាស្ទ្រីប ដោយសារតែកង្វះដ៏ធ្ងន់ធ្ងរនៃទឹកដោះគោសម្រាប់    ទារក។

យោងតាមទីភ្នាក់ងារនេះ ទារកជាង ៨.៥០០នាក់ នៅតំបន់ហ្កាហ្សា ពឹងផ្អែកលើរូបមន្ត ដែលផ្តល់តាមរយៈ អង្គការ UNRWA ប៉ុន្តែការផ្គត់ផ្គង់នាពេលបច្ចុប្បន្ន គឺមិនគ្រប់គ្រាន់ទេ។ មណ្ឌលសុខភាពរបស់ UNRWA មួយ ក្នុងចំណោមមណ្ឌលសុខភាពមួយចំនួនដែលដំណើរការនៅភាគខាងត្បូងហ្កាហ្សា មានទឹកដោះគោ ចំនួន៦ប្រអប់ ដែលនៅសល់សម្រាប់ការចែកចាយ។

ទីភ្នាក់ងារនេះ បាននិយាយថា៖«ជាមួយនឹងមនុស្សជាង ២០០.000នាក់ ដែលពឹងផ្អែកលើមជ្ឈមណ្ឌលនេះសម្រាប់ការថែទាំសុខភាពបឋម កង្វះខាតការផ្គត់ផ្គង់យ៉ាងធ្ងន់ធ្ងរ ធ្វើឲ្យមនុស្សជាច្រើន រួមទាំងទារកស្ថិតក្នុងស្ថានភាពគ្រោះថ្នាក់យ៉ាងធ្ងន់ធ្ងរ» ។

UNRWA បានសង្កត់ធ្ងន់ថា ការផ្តល់ជំនួយមនុស្សធម៌ជាបន្ទាន់ និងបទឈប់បាញ់ មានសារៈសំខាន់ណាស់ ក្នុងការទប់ស្កាត់ការបាត់បង់អាយុជីវិតបន្ថែមទៀត។

ទោះបីជាធនធានមានកម្រិត និងតម្រូវការដ៏ច្រើនលើសលប់ក៏ដោយ ទីភ្នាក់ងារនេះ ក៏បានប្រកាសបន្តការគាំទ្រសម្រាប់ជនងាយរងគ្រោះបំផុត នៅក្នុងទីក្រុង Khan Younis រួមទាំងការផ្តល់សម្លៀកបំពាក់រដូវរងា និងការផ្គត់ផ្គង់អនាម័យ ដល់កុមារនៅមជ្ឈមណ្ឌលរបស់ UNRWA សម្រាប់ការស្តារឡើងវិញនូវកុមារដែលមានពិការភាពមើលមិនឃើញ។