នាយករដ្ឋមន្ត្រីអ៊ុយក្រែន លោក Denys Shmyhal បានថ្លែងកាលពីថ្ងៃចន្ទថា កិច្ចព្រមព្រៀងដែលអនុញ្ញាតឲ្យការដឹកជញ្ជូនឧស្ម័នរុស្ស៊ី ឆ្លងកាត់ប្រទេសរបស់លោក នឹងមិនត្រូវបានពន្យារបន្តហួសពីចុងឆ្នាំនោះទេ ខណៈដែលប្រទេសអឺរ៉ុបមួយចំនួន បានបង្កើនការស្វែងរកការផ្គត់ផ្គង់ ដែលត្រូវការចាំបាច់។

លោក Shmyhal ដែលសរសេរនៅលើកម្មវិធីផ្ញើសារ Telegram បន្ទាប់ពីបាននិយាយទៅកាន់នាយក  រដ្ឋមន្រ្តីស្លូវ៉ាគីលោក Robert Fico បានបញ្ជាក់ថា អ៊ុយក្រែនមានឆន្ទៈ ក្នុងការពិភាក្សាអំពីការដឹកជញ្ជូន    ឧស្ម័ននៃប្រភពដើមណាមួយ លើកលែងតែប្រទេសរុស្ស៊ី។

លោក Shmyhal បានបន្ថែមទៀតថា៖«ចំពោះបញ្ហានេះ ប្រសិនបើគណៈកម្មការអឺរ៉ុប ចូលទៅជិតអ៊ុយក្រែនជាផ្លូវការអំពីការបញ្ជូនឧស្ម័នណាមួយ ក្រៅពីរុស្ស៊ី យើងនឹងពិភាក្សាគ្នាជាក់ស្តែង ហើយត្រៀមខ្លួនរួចរាល់ ដើម្បីឈានដល់កិច្ចព្រមព្រៀងសមស្របមួយ»។ 

«ខ្ញុំបានបញ្ជាក់ហើតថា កិច្ចព្រមព្រៀងរបស់អ៊ុយក្រែនជាមួយរុស្ស៊ីលើការដឹកជញ្ជូនឧស្ម័ន នឹងបញ្ចប់ នៅថ្ងៃទី ០១ ខែមករា ឆ្នាំ ២០២៥ ហើយនឹងមិនត្រូវបានបន្តតទៅទៀតទេ។

លោក Shmyhal បាននិយាយថា ការងារជាច្រើន បានធ្វើរួចមកហើយ កាលពីឆ្នាំមុន ដើម្បីធានាការផ្គត់ផ្គង់ថាមពលគ្រប់គ្រាន់ ជាពិសេសឧស្ម័ន ដល់បណ្តាប្រទេសសហភាពអឺរ៉ុប។

ប្រទេសអ៊ុយក្រែន ដែលជាប់គាំងនៅក្នុងសង្រ្គាមរយៈពេល ៣៣ខែ ជាមួយរុស្ស៊ី បាននិយាយជាច្រើនខែថា វាមិនទំនងដថា កិច្ចសន្យាដឹកជញ្ជូនឧស្ម័ន នឹងត្រូវបានបន្តតទៅទៀតទេ។