ប្រមុខផ្នែកជំនួយរបស់អង្គការសហប្រជាជាតិ (UN) លោក Tom Fletcher បានជួបជាមួយមេបញ្ជាការរដ្ឋបាលថ្មីរបស់ប្រទេសស៊ីរី លោក Ahmed al-Sharaa និងនាយករដ្ឋមន្ត្រីទើបតែងតាំងថ្មី លោក Mohammed al-Bashir កាលពីថ្ងៃចន្ទ (ទី១៦ ខែធ្នូ) ដើម្បីពិភាក្សាអំពីការបង្កើនជំនួយមនុស្សធម៌ នៅក្នុងប្រទេសនេះ។

បន្ទាប់ពីកិច្ចប្រជុំរបស់លោក Fletcher អគ្គលេខាធិការ UN លោក Antonio Guterres បានលើកឡើងនៅក្នុងសេចក្តីថ្លែងការណ៍មួយថា លោកស្វាគមន៍ចំពោះការប្តេជ្ញាចិត្តរបស់រដ្ឋាភិបាលចាំផ្ទះ ក្នុងការការពារជនស៊ីវិល ក្នុងនោះរួមទាំងបុគ្គលិកមនុស្សធម៌ផងដែរ។

នៅក្នុងសេចក្ដីថ្លែងការណ៍នោះ លោក Guterres បានរៀបរាប់ថា៖ «ខ្ញុំក៏ស្វាគមន៍ផងដែរ ចំពោះកិច្ចព្រមព្រៀងរបស់ពួកគេ ក្នុងការផ្តល់លទ្ធភាពដល់ប្រតិបត្តិការមនុស្សធម៌ពេញលេញ ឆ្លងតាមរយៈច្រកព្រំដែនទាំងអស់ កាត់បន្ថយការិយាធិបតេយ្យ ជុំវិញការអនុញ្ញាត និងការផ្ដល់ទិដ្ឋាការ សម្រាប់បុគ្គលិកមនុស្សធម៌ ធានាដល់ការបន្តនៃសេវាសំខាន់ៗរបស់រដ្ឋាភិបាល ដែលរួមមានទាំងសុខភាព និងការអប់រំ ហើយចូលរួមការសន្ទនាយ៉ាងស្មោះត្រង់ និងជាក់ស្តែងជាមួយសហគមន៍មនុស្សធម៌ដ៏ទូលំទូលាយ»។

គួរបញ្ជាក់ថា មេដឹកនាំស៊ីរី លោក Bashar al-Assad ត្រូវបានទម្លាក់ចេញពីអំណាច បន្ទាប់ពីកងកម្លាំងបះបោរដឹកនាំដោយក្រុមអ៊ិស្លាមនិយម Hayat Tahrir al-Sham (THS) បានលុកលុយពេញប្រទេសស៊ីរី នៅក្នុងការវាយលុកដ៏លឿនរហ័សដូចផ្លេកបន្ទោរមួយ ដោយបញ្ចប់ការគ្រប់គ្រងយ៉ាងតឹងរ៉ឹងអស់រយៈពេលជាង ៥០ឆ្នាំដោយគ្រួសាររបស់លោក៕