ភ្នំពេញ៖ឯកឧត្តម វ៉ាង វិនពីន (WANG Wenbin) ឯកអគ្គរដ្ឋទូត នៃសាធារណរដ្ឋប្រជាមានិតចិន ប្រចាំនៅកម្ពុជា បានបញ្ជាក់ថា ភាគីចិននឹងបន្តគាំទ្រយ៉ាងមុតមាំដល់ភាគីកម្ពុជាក្នុងការកសាងគម្រោងហេដ្ឋារចនាសម្ព័ន្ធពាក់ព័ន្ធនឹងផែនការជីវភាពរស់នៅរបស់ប្រជាជន។

តាមតយៈបណ្ដាញសង្គមហ្វេសប៊ុកផ្លូវការ នៅយប់ថ្ថៃទី១៧ ខែធ្នូនេះ ឯកអគ្គរដ្ឋទូត នៃសាធារណរដ្ឋប្រជាមានិតចិន បានមានប្រសាសន៍ថា ជំនួយរបស់ចិនមកកាន់កម្ពុជាទទួលបានសមិទ្ធផលផ្លែផ្កាជាច្រើនអនេក គម្រោងជំនួយថ្មីៗក៏កំពុងតែដំណើរការ។

ឯកឧត្តមថ្លែងថា ភាគីចិននឹងបន្តគាំទ្រយ៉ាងមុតមាំដល់ភាគីកម្ពុជាក្នុងការកសាងគម្រោងហេដ្ឋារចនាសម្ព័ន្ធពាក់ព័ន្ធនឹងផែនការជីវភាពរស់នៅរបស់ប្រជាជន។ រាល់បំណងប៉ុនប៉ងលាបពណ៌លើកិច្ចសហប្រតិបត្តិរវាងចិននិងកម្ពុជា គឺមិនអាចទៅរួចបានឡើយ។

សូមជម្រាបថា ការបញ្ជាក់របស់ ឯកអគ្គរដ្ឋទូត នៃសាធារណរដ្ឋប្រជាមានិតចិនបែបនេះ បន្ទាប់ពី សាព័ត៌មាន រ៉យទ័រ បាន​ចុះ​ផ្សាយ​កាល​ពី​ថ្ងៃ​ទី១១ ខែ​ធ្នូ​កន្លង​ទៅ​ថា ចិន​មិន​បាន​អនុម័ត​កម្ចី​ណា​មួយ​សម្រាប់​កម្ពុជា​នោះ​ទេ នៅ​ឆ្នាំ​២០២៤​នេះ ដោយ​យោង​ទៅ​លើ​ទិន្នន័យ​ក្រសួង​សេដ្ឋកិច្ច​និង​ហិរញ្ញវត្ថុ​សម្រាប់​ត្រីមាស​ទី៣​ ឆ្នាំ​២០២៤​នេះ។ 

ឆ្លើយតបការចុះផ្សាយនេះដែរ ប៉ុន្មាន​ថ្ងៃ​បន្ទាប់​ពី​ទីភ្នាក់ងារ​សារព័ត៌មាន​រ៉យទ័រ (Reuters) បាន​ចុះ​ផ្សាយ​ថា ចិន​ដែល​ជា​ «ម្ចាស់​បំណុល» ឈប់​ផ្ដល់​កម្ចី​ដល់​កម្ពុជា ឯកឧត្តម មាស សុខ​សេនសាន អ្នកនាំពាក្យ​ក្រសួង​សេដ្ឋកិច្ច និង​ហិរញ្ញវត្ថុ ថ្លែង​នៅ​ថ្ងៃ​ទី១៤ ខែធ្នូ ថា បាន​បដិសេធ​ការ​ចុះ​ផ្សាយ​បែប​នេះ និង​ចាត់​ទុក​ថា​ជា​ព័ត៌មាន​ដើម្បី​បំភាន់​សាធារណមតិ និង​«គួរ​ឲ្យ​អស់​សំណើច»៕