ក្រុមហាម៉ាសបាននិយាយថា កិច្ចពិភាក្សាក្នុងប្រទេសកាតាកាលពីថ្ងៃអង្គារទី១៧ធ្នូសប្ដាហ៍នេះ មានគោលដៅលើបទឈប់បាញ់ និងការដោះដូរអ្នកទោសចំណាប់ខ្មាំងនៅហ្កាហ្សាប្រកបដោយភាពហ្មត់ចត់ និងវិជ្ជមានមួយថ្ងៃបន្ទាប់ពីគណៈប្រតិភូអ៊ីស្រាអែលបានទៅជួបក្រុមអ្នកសម្របសម្រួល។ 

ក្រុមហាម៉ាស បញ្ជាក់ថា ដោយគិតពីការពិភាក្សាដ៏ជាក់លាក់ និងវិជ្ជមាន ដែលធ្វើឡើងនៅថ្ងៃនេះ នៅទីក្រុងដូហា ក្រោមការឧបត្ថម្ភពីបងប្អូនកាតា និងអេហ្ស៊ីបរបស់យើង ការឈានដល់កិច្ចព្រមព្រៀងមួយសម្រាប់បទឈប់បាញ់ និងការដោះដូរអ្នកទោសគឺអាចធ្វើទៅបាន ប្រសិនបើអ៊ីស្រាអែល ឈប់ដាក់លក្ខខណ្ឌថ្មី។

ប្រភពដែលបានដឹងអំពីការចរចានោះ បានប្រាប់សារព័ត៌មាន AFP ថា ក្រុមមន្ត្រីអ៊ីស្រាអែលបានទៅដល់ទីក្រុងដូហាកាលពីថ្ងៃចន្ទ សម្រាប់កិច្ចពិភាក្សាបំណងកាត់បន្ថយគម្លាតរវាងភាគីទាំងពីរ។

ប្រភពបាននិយាយថា ជំនួបនានាបានធ្វើឡើងបន្ទាប់ពីដំណើរទស្សនកិច្ចទៅកាន់រដ្ឋធានីកាតាកាលពីថ្ងៃពុធសប្តាហ៍មុន ដោយប្រធានចារកម្ម Mossad លោក David Barnea ។

ប្រទេសកាតា រួមជាមួយសហរដ្ឋអាមេរិក និងអេហ្ស៊ីប បាននឹងកំពុងសម្របសម្រួលរវាងអ៊ីស្រាអែល និងក្រុមហាម៉ាសអស់រយៈពេលជាច្រើនខែក្នុងដំណើរស្វែងរកបទឈប់បាញ់នៅដែនដីហ្កាហ្សា និងការដោះលែងចំណាប់ខ្មាំង។

កាលពីថ្ងៃចន្ទ រដ្ឋមន្ត្រីការពារជាតិអ៊ីស្រាអែល លោក អ៊ីស្រាអែល ខាត់ស៍ (Israel Katz) បាននិយាយថា ក្រុមអ្នកចរចាអ៊ីស្រាអែល ពុំធ្លាប់មើលឃើញកិច្ចព្រមព្រៀងជិតសម្រេចបានបែបនេះពីមុនមកទេ ចាប់តាំងពីបទឈប់បាញ់ខែវិច្ឆិកា ឆ្នាំ ២០២៣មក៕