លោកប្រធានាធិបតី Yoon Suk Yeol បានខកខានការបង្ហាញខ្លួននៅចំពោះមុខការិយាល័យស៊ើបអង្កេតអំពើពុករលួយសម្រាប់មន្ត្រីជាន់ខ្ពស់ហៅកាត់ថា CIO នៅថ្ងៃពុធសប្ដាហ៍នេះ ដោយបានជំទាស់ ការកោះហៅសម្រាប់ការសាកសួរជុំវិញការដាក់ច្បាប់អាជ្ញាសឹករយៈពេលខ្លីរបស់លោក។

លោក Yoon ត្រូវបានស្នើដោយក្រុមស៊ើបអង្កេតចម្រុះដែលបង្កើតឡើងដោយការិយាល័យ CIO នគរបាល និងអង្គភាពស៊ើបអង្កេតរបស់ក្រសួងការពារជាតិ ឱ្យបង្ហាញខ្លួននៅការិយាល័យ CIO ក្នុងទីក្រុងក្វាជុន(Gwacheon)ភាគខាងត្បូងទីក្រុងសេអ៊ូលនៅម៉ោង ១០ ព្រឹកថ្ងៃពុធនេះ ។

លោកYoon ដែលត្រូវបានចោទប្រកាន់ទម្លាក់តំណែងកាលពីថ្ងៃសៅរ៍ចុងសប្ដាហ៍មុន ប្រឈមនឹងការចោទប្រកាន់ពីបទញុះញង់ឱ្យមានការបះបោរតាមរយៈការប្រកាសច្បាប់អាជ្ញាសឹករបស់លោកកាលពីថ្ងៃទី ៣ ខែធ្នូ ហើយត្រូវបានព្យួរពីតួនាទី ដោយរង់ចាំការកាត់ក្តីរបស់តុលាការធម្មនុញ្ញលើការចោទប្រកាន់ទម្លាក់តំណែងលោកដោយរដ្ឋសភា។

ការប៉ុនប៉ងជាច្រើនដងក្នុងការបញ្ជូនដីកាកោះហៅទៅកាន់លោក Yoon បានបរាជ័យកាលពីដើមសប្តាហ៍នេះ បន្ទាប់ពីការិយាល័យប្រធានាធិបតីបដិសេធមិនទទួលយក ឬផ្ញើលិខិតត្រឡប់មកវិញ។

ប្រធាន CIO លោក Oh Dong-woon បានប្រាប់គណៈកម្មាធិការនីតិកម្មរបស់រដ្ឋសភាកាលពីថ្ងៃអង្គារសប្ដាហ៍នេះ ថា ការកោះហៅនេះកំពុងត្រូវបានបដិសេធដោយចេតនា ហើយថាទីភ្នាក់ងាររបស់លោកនឹងចាត់វិធានការស្របច្បាប់យ៉ាងឆាប់រហ័សក្នុងការឆ្លើយតបករណីនេះ ៕