ឧត្តមសេនីយជាន់ខ្ពស់រុស្ស៊ីម្នាក់ ដែលត្រូវបានចោទប្រកាន់ដោយអ៊ុយក្រែនថា ជាអ្នកទទួលខុសត្រូវចំពោះការប្រើប្រាស់អាវុធគីមីប្រឆាំងកងទ័ពអ៊ុយក្រែន ត្រូវបានធ្វើឃាតនៅទីក្រុងមូស្គូ ដោយអង្គភាពសេវាស៊ើបការណ៍សម្ងាត់របស់អ៊ុយក្រែន កាលពីព្រឹកថ្ងៃអង្គារ ទី១៧ ខែធ្នូ។

គណៈកម្មាធិការស៊ើបអង្កេតរបស់រុស្ស៊ី ដែលស៊ើបអង្កេតករណីព្រហ្មទណ្ឌកម្រិតធ្ងន់ បាននិយាយថា ឧត្តមសេនីយ Igor Kirillov ជាមេបញ្ជាការកងទ័ពការពារនុយក្លេអ៊ែរ ជីវសាស្ត្រ និងគីមីសាស្ត្រ របស់រុស្ស៊ី ត្រូវបានសម្លាប់នៅខាងក្រៅអគារលំនៅឋានមួយកន្លែង រួមជាមួយជំនួយការរបស់លោក នៅពេលដែលគ្រាប់បែកមួយគ្រាប់ដែលបង្កប់នៅក្នុងម៉ូតូអគ្គិសនី មួយគ្រឿងត្រូវបានបំផ្ទុះ។

ប្រភពពីអង្គភាពស៊ើបការណ៍សម្ងាត់ បានបញ្ជាក់ប្រាប់សារព័ត៌មានរ៉យទ័រថា ទីភ្នាក់ងារស៊ើបការណ៍សម្ងាត់អ៊ុយក្រែន ជាអ្នកនៅពីក្រោយការវាយប្រហារនេះ។

ប្រភពព័ត៌មាននិយាយបន្ថែមថា «លោក Kirillov គឺជាឧក្រិដ្ឋជនសង្រ្គាម និងជាគោលដៅស្របច្បាប់ពិតប្រាកដ ខណៈលោក បានចេញបញ្ជាឱ្យប្រើប្រាស់អាវុធគីមីដែលត្រូវបានហាមឃាត់ប្រឆាំងយោធាអ៊ុយក្រែន»។