រដ្ឋមន្ត្រីការបរទេសកូរ៉េខាងត្បូង លោក ឆូ តែយ៉ុល (Cho Tae-yul) បាននិយាយនៅថ្ងៃពុធ (១៨ ធ្នូ) នេះថា កិច្ចប្រឹងប្រែងរយៈពេលខ្លីរបស់លោកប្រធានាធិបតី Yoon Suk Yeol ក្នុងការដាក់ច្បាប់អាជ្ញាសឹក បានបង្កើតដែនកំណត់មួយចំនួនក្នុងទំនាក់ទំនងជាមួយក្រុមរបស់ប្រធានាធិបតីជាប់ឆ្នោតអាមេរិក លោក Donald Trump និងកាត់បន្ថយសន្ទុះនយោបាយរបស់ភាគីទាំងពីរ។

នៅក្នុងសន្និសីទសារព័ត៌មានរួមគ្នាដ៏កម្រមួយសម្រាប់ប្រព័ន្ធផ្សព្វផ្សាយបរទេស លោក Cho និងរដ្ឋមន្ត្រីក្រសួងហិរញ្ញវត្ថុ ឆយ សាងម៉ុក (Choi Sang-mok) បានស្វះស្វែងរកការធានាឡើងវិញចំពោះសម្ព័ន្ធមិត្តរបស់ទីក្រុងសេអ៊ូល និងធ្វើឱ្យអស្ថិរភាពទីផ្សារស្ងប់ស្ងាត់ ចាប់តាំងពីការប៉ុនប៉ងដាក់ច្បាប់អាជ្ញាសឹកដ៏ភ្ញាក់ផ្អើល និងបង្កឱ្យមានវិបត្តិនយោបាយដ៏ធំបំផុតក្នុងពេលជាច្រើនទសវត្សរ៍មកនេះ។

លោក Cho បានលើកឡើងថា ទីក្រុងសេអ៊ូល បានកសាងបណ្តាញ និងផ្លូវទំនាក់ទំនងជាមួយនឹងក្រុមយុទ្ធនាការរបស់លោក Trump ដែល "ខ្លាំងក្លាជាងប្រទេសដទៃទៀត" ប៉ុន្តែបទបញ្ជាច្បាប់អាជ្ញាសឹកបានធ្វើឱ្យខូច "សន្ទុះនយោបាយ" រវាងភាគីទាំងពីរ។

ច្បាប់អាជ្ញាសឹករបស់លោក Yoon បានបង្កឱ្យមានភាពមិនច្បាស់លាស់ខាងនយោបាយ ដែលអាចបន្ថែមហានិភ័យសេដ្ឋកិច្ច ខណៈបណ្ដាអ្នកបង្កើតគោលនយោបាយព្រួយបារម្ភពីផលប៉ះពាល់នៃផែនការពន្ធរបស់លោក Trump លើសេដ្ឋកិច្ច ដែលពឹងផ្អែកលើពាណិជ្ជកម្មរបស់ពួកគេ៕