យោងតាមការពិនិត្យឡើងវិញនៃទិន្នន័យដែលប្រមូលបានដោយមូលដ្ឋានទិន្នន័យការបាញ់ប្រហាររបស់សាលារៀន K-12 បានបង្ហាញថា អំពើហិង្សាដោយកាំភ្លើង នៅតាមសាលារៀនអាមេរិក មើលឃើញកំណើនគួរឱ្យកត់សម្គាល់ក្នុងរយៈពេល ៤ឆ្នាំចុងក្រោយនេះ ចាប់តាំងពីជំងឺរាតត្បាតកូវីដ១៩មក។

ការបាញ់ប្រហារច្រើនជាង ៥០ករណី ជាមួយជនរងគ្រោះយ៉ាងហោចណាស់ម្នាក់ បានកើតឡើងក្នុងអំឡុងពេលការសិក្សារៀងរាល់ឆ្នាំ ចាប់តាំងពីឆ្នាំ២០២១ មក នេះបើយោងតាមគម្រោងស្រាវជ្រាវ។ ជនរងគ្រោះ និងជនសង្ស័យ មិនមែនសុទ្ធតែជាអនីតិជនទាំងអស់នោះទេ។

ចាប់ពីឆ្នាំ២០១០ ដល់ឆ្នាំ២០១៩ តួលេខនៃការបាញ់ប្រហារប្រចាំឆ្នាំមិនលើសពី ៣០ដងឡើយ។ ការកើនឡើងនៃហិង្សាដោយកាំភ្លើងក្នុងសាលារៀននេះ បានក្លាយជាប្រធានបទក្ដៅគគុកឡើងវិញក្នុងសប្តាហ៍នេះ បន្ទាប់ពីអាជ្ញាធរបាននិយាយថា សិស្សស្រី វ័យ ១៥ឆ្នាំម្នាក់ បានបើកការបាញ់ប្រហារនៅសាលាមួួយន្លែងក្នុងទីក្រុង Madison រដ្ឋ Wisconsin កាលពីថ្ងៃទី១៦ ខែធ្នូ ដោយបានសម្លាប់សិស្សម្នាក់ និងគ្រូបង្រៀនម្នាក់ រួចក៏សម្លាប់ខ្លួនឯង។

ការបាញ់ប្រហារនៅសាលារៀន ជាតួលេខតិចជាង ១% ប៉ុណ្ណោះនៃការស្លាប់របស់កុមារអាមេរិក ដោយសារហិង្សាដោយកាំភ្លើង។ ទិន្នន័យបង្ហាញថា ឧប្បត្តិហេតុបែបនេះទំនងជាកើតឡើងនៅខាងក្រៅ ច្រើនជាងនៅក្នុងសាលារៀន។ ទោះយ៉ាងណាក៏ដោយ សិស្សសាលារាប់សែននាក់នៅអាមេរិក បានប្រឈមមុខនឹងហិង្សាដោយកាំភ្លើងនៅតាមសាលារៀន ចាប់តាំងពីការបាញ់ប្រហារនៅវិទ្យាល័យ Columbine ក្នុងឆ្នាំ១៩៩៩ មក៕