នាយករដ្ឋមន្ត្រីប៉ូឡូញលោក ដូណាល់ ថាស់ (Donald Tusk) បានអំពាវនាវឲ្យបញ្ចប់ការរំពឹងទុកទាក់ទងនឹងលទ្ធភាពការដាក់ពង្រាយកងទ័ពប៉ូឡូញនៅក្នុងអ៊ុយក្រែន ក្នុងនាមជាអ្នករក្សាសន្តិភាព។

លោក ថាស់ បាននិយាយនៅក្នុងសន្និសីទសារព័ត៌មានមួយ ដែលចេញផ្សាយដោយសារព័ត៌មាន TVP ថា៖«ខ្ញុំចង់ផ្តល់យោបល់ថា នៅចំណុចនេះ យើងបដិសេធពីការរំពឹងទុកអំពីអ្វីដែលអាចជា ឬអំពីអ្វីដែលភាគីពាក់ព័ន្ធនឹងធ្វើ នៅពេលដែលសន្តិភាព ឬបទឈប់បាញ់ ត្រូវបានសម្រេច»។

លោកក៏បានព្រមានប្រឆាំងនឹងការផ្តល់ការធានាសន្តិសុខអ៊ុយក្រែន ដែលទីបំផុតអាចបង្ហាញថា មិនអាចអនុវត្តបាន។

លោកបានបន្តថា៖« ប៉ូឡូញនៅតែចងចាំពីអ្វីដែលបានកើតឡើងជាច្រើនទសវត្សរ៍មុន។ ប៉ូឡូញបានទទួលការធានាសុវត្ថិភាព នៅចំណុចមួយចំនួន ប៉ុន្តែពួកគេត្រូវបានកំណត់ត្រឹមថាជាក្រដាសប៉ុណ្ណោះ។

យើងចង់ជៀសវាងស្ថានភាពនេះ»។ «បច្ចុប្បន្ននេះ ជាមួយលោក ហ្សេឡិនស្គី ( Zelensky) យើងនឹងពិភាក្សាអំពីរបៀបដែលលោកខាងលិច និងអ៊ុយក្រែន អាចរៀបចំបានប្រសើរជាងមុនសម្រាប់ខែខាងមុខនេះ ប៉ុន្តែនឹងមិនមានការចរចាអំពីអ្នកណាដែលត្រៀមខ្លួនរួចជាស្រេច ក្នុងការដាក់កងទ័ពនៅលើដីអ៊ុយក្រែន ហើយតើពួកគេមានចំនួនប៉ុន្មាននាក់ នឹងត្រូវ[បានដាក់ពង្រាយ]នោះ?»។

យោងតាមរបាយការណ៍មុនរបស់សារព័ត៌មានរ៉យទ័របានឲ្យដឹងថា សមាជិកសហភាពអឺរ៉ុប នៅតែបែងចែកថាតើអឺរ៉ុបអាចដាក់ពង្រាយទាហាននៅលើដីអ៊ុយក្រែនដែរឬយ៉ាងណា ប្រសិនបើបទឈប់បាញ់ ត្រូវបានឈានដល់រវាងទីក្រុងមូស្គូ និងទីក្រុងគីវ។ ទីភ្នាក់ងារនេះ បានបន្តថា លទ្ធភាពត្រូវបានពិភាក្សាពីមុនដោយប្រធានាធិបតីបារាំង អេម៉ានុយអែល ម៉ាក្រុង (Emmanuel Macron) និងនាយករដ្ឋមន្ត្រីប៉ូឡូញលោក ដូណាល់ ថាស់ នៅទីក្រុងវ៉ាសូវី (Warsaw)។ បន្ទាប់ពីកិច្ចពិភាក្សានោះ លោក ដូណាល់ ថាស់ បាននិយាយថា ប្រទេសប៉ូឡូញ មិនមានផែនការដាក់ពង្រាយកងរក្សាសន្តិភាព ក្នុងប្រទេសអ៊ុយក្រែនទេ ទោះបីជាបទឈប់បាញ់ ត្រូវបានសម្រេចក៏ដោយ។