អធិការបតីអាល្លឺម៉ង់ លោក អូឡាហ្វ សូល (Olaf Scholz) បាននិយាយថា លោកសង្ឃឹមថា ជំហររបស់សហរដ្ឋអាមេរិក លើអាវុធរយៈចម្ងាយឆ្ងាយ សម្រាប់អ៊ុយក្រែន នឹងផ្លាស់ប្តូរ បន្ទាប់ពីលោក ដូណាល់ ត្រាំ ( Donald Trump) ចូលកាន់តំណែង។

ការបង្ហាញកម្មវិធីបោះឆ្នោតរបស់គណបក្សរបស់ខ្លួន គណបក្សសង្គមប្រជាធិបតេយ្យអាល្លឺម៉ង់ (SPD) នៅក្នុងសន្និសីទសារព័ត៌មាននៅទីក្រុងប៊ែរឡាំង លោក សូល ដែលជាបេក្ខភាពរបស់គណបក្សនេះសម្រាប់ធ្វើជាអធិការបតី បាននិយាយថា លោកអាចមើលឃើញថា លោក ត្រាំ នៅខាងខ្លួនទាក់ទងនឹងការបដិសេធក្នុងការផ្គត់ផ្គង់មីស៊ីលតម្រង់គោលដៅរយៈចម្ងាយឆ្ងាយ Taurus ទៅឲ្យអ៊ុយក្រែន។ លោក ត្រាំ បាននិយាយម្តងទៀតថា គាត់គិតថា ការអនុញ្ញាតឲ្យអ៊ុយក្រែនប្រើអាវុធរយៈចម្ងាយឆ្ងាយសម្រាប់ការវាយប្រហារ នៅក្នុងប្រទេសរុស្ស៊ី គឺជា «ការសម្រេចចិត្តខុស»។  

លោក សូល បាននិយាយថា៖«ប្រសិនបើខ្ញុំយល់បានត្រឹមត្រូវ នេះនឹងត្រូវបានមើលស្រដៀងគ្នា នាពេលអនាគត រួមទាំងនៅក្នុងកិច្ចសហប្រតិបត្តិការឆ្លងមហាសមុទ្រអាត្លង់ទិក។ យ៉ាងហោចណាស់ នោះគឺជាអ្វីដែលខ្ញុំបានប្រមូលពីបទសម្ភាសន៍ថ្មីៗរបស់លោកប្រធានាធិបតី ត្រាំ។

លោកអធិការបតី បានបដិសេធម្តងហើយម្តងទៀត ក្នុងការបញ្ជូនមីស៊ីល Taurus ទៅកាន់អ៊ុយក្រែនដោយនិយាយថា ការសម្រេចនេះ នឹងបង្កឲ្យមានហានិភ័យធ្ងន់ធ្ងរ។

ប្រធានាធិបតីជាប់ឆ្នោតរបស់សហរដ្ឋអាមេរិក លោក ដូណាល់ ត្រាំ បានប្រាប់សន្និសីទសារព័ត៌មាន នៅ ភូមិគ្រឹះ Mar-a-Lago របស់គាត់ នៅក្នុងរដ្ឋ Florida កាលពីថ្ងៃចន្ទថា ការសម្រេចចិត្តរបស់លោកប្រធានាធិបតី ចូ បៃដិន (Joe Biden) ក្នុងការអនុញ្ញាតឲ្យមានការវាយប្រហារកាន់តែស៊ីជម្រៅ នៅក្នុងប្រទេសរុស្ស៊ី គឺជា «រឿងឆោតល្ងង់បំផុត ដែលត្រូវធ្វើ»។