នាយករដ្ឋមន្ត្រីអ៊ីស្រាអែល លោក បេនចាមីន ណេតាន់យ៉ាហ៊ូ ( Benjamin Netanyahu) បានប្តេជ្ញាកាលពីថ្ងៃអង្គារថា លោកនឹងមិនអនុញ្ញាតឲ្យមានការបង្កើតរដ្ឋប៉ាឡេស្ទីន ដោយច្រានចោលរបាយការណ៍ដែលថា អ៊ីស្រាអែល បានយល់ព្រមលើ «ផ្លូវឆ្ពោះទៅកាន់ភាពជារដ្ឋប៉ាឡេស្ទីន» ដែលជាផ្នែកនៃកិច្ចខិតខំប្រឹងប្រែង ដើម្បីធ្វើប្រក្រតីភាពទំនាក់ទំនងជាមួយអារ៉ាប៊ីសាអ៊ូឌីត។

ការិយាល័យរបស់លោកបាននិយាយនៅក្នុងសេចក្តីថ្លែងការណ៍មួយថា៖«លោក នាយករដ្ឋមន្ត្រី ណេតាន់យ៉ាហ៊ូ បានធ្វើសកម្មភាព និងបន្តធ្វើសកម្មភាពប្រឆាំងនឹងការបង្កើតរដ្ឋប៉ាឡេស្ទីន» ដោយពិពណ៌នារបាយការណ៍ថា «មិនពិតទាំងស្រុង»។ សេចក្តីថ្លែងការណ៍ បានបន្ថែមថា ចំណាត់ការបែបនេះ នឹង «បង្កគ្រោះថ្នាក់ដល់សន្តិសុខរបស់អ៊ីស្រាអែល»។

ប្រព័ន្ធផ្សព្វផ្សាយអ៊ីស្រាអែលមុននេះ បានរាយការណ៍ថា សម្បទានលើភាពជារដ្ឋរបស់ប៉ាឡេស្ទីន កំពុងត្រូវបានចាត់ទុកថា ជាផ្នែកមួយនៃការចរចាដែលកំពុងបន្តសម្រាប់កិច្ចព្រមព្រៀងប្រក្រតីភាពទំនាក់ទំនង ជាមួយអារ៉ាប៊ីសាអ៊ូឌីត។ លោក ណេតាន់យ៉ាហ៊ូ ដែលបានចាត់ទុកទំនាក់ទំនងផ្លូវការជាមួយព្រះរាជាណាចក្រនេះ ជាយូរយារណាស់មកហើយថា ជាគោលដៅយុទ្ធសាស្ត្រដ៏សំខាន់ បានច្រានចោលរបាយការណ៍នេះ។

អ៊ីស្រាអែលបានដណ្តើមយកតំបន់វេសបែង (West Bank) , ទីក្រុងហ្ស៊េរុយសាឡឹមខាងកើត ( East Jerusalem) , និងតំបន់ហ្កាហ្សាស្ទ្រីប( Gaza Strip) នៅក្នុងសង្រ្គាមមជ្ឈិមបូព៌ាឆ្នាំ ១៩៦៧ ។ ប៉ាឡេស្ទីនព្យាយាមបង្កើតរដ្ឋឯករាជ្យ នៅក្នុងទឹកដីទាំងនោះ។