ក្រសួងសន្តិសុខសាធារណៈរបស់ប្រទេសវៀតណាម បាននិយាយនៅថ្ងៃព្រហស្បតិ៍ (១៩ ធ្នូ) នេះថា មនុស្សចំនួន ១១នាក់ បានស្លាប់ក្នុងអគ្គីភ័យនៅហាងកាហ្វេមួយកន្លែងក្នុងទីក្រុងហាណូយ កាលពីយប់ថ្ងៃពុធ ហើយនគរបាលបានចាប់ខ្លួនបុរសម្នាក់ដែលសង្ស័យថាបានបង្កអគ្គិភ័យនេះ។

នគរបាលបាននិយាយនៅក្នុងសេចក្តីថ្លែងការណ៍មួយថា បុរសនោះបានសារភាពថាបានប្រើសាំងដើម្បីដុតភ្លើងនៅជាន់ផ្ទាល់ដីនៃហាងកាហ្វេកម្ពស់ ៣ជាន់ បន្ទាប់ពីមានជម្លោះជាមួយបុគ្គលិក ហើយអគ្គិភ័យត្រូវបានរាយការណ៍ជាលើកដំបូងបន្ទាប់ពីម៉ោង ១១យប់ (ម៉ោងក្នុងស្រុក) កាលពីថ្ងៃពុធ។

កាសែតរដ្ឋ Tien Phong បានរាយការណ៍ថា ជនសង្ស័យស្ថិតក្នុងវ័យ៥០ឆ្នាំ។ សាក្សីម្នាក់បានប្រាប់សារព័ត៌មាន Tien Phong ថា "អណ្ដាតភ្លើងបានបិទច្រកចេញទាំងអស់ ហើយមានធុំក្លិនសាំងខ្លាំង" ខណៈសាក្សីម្នាក់ទៀតរាយការណ៍ថា បានឮសំឡេងផ្ទុះចេញពីទីតាំងកើតហេតុ។

សេចក្តីថ្លែងការណ៍របស់នគរបាលបញ្ជាក់ថា មនុស្ស ៧នាក់ ត្រូវបានជួយសង្គ្រោះពីអគ្គិភ័យ ដោយក្នុងនោះ ២នាក់ត្រូវបានបញ្ជូនទៅមន្ទីរពេទ្យ៕