អាជ្ញាធរ បានប្រកាសកាលពីថ្ងៃពុធថា អ្នកជំងឺម្នាក់នៅរដ្ឋ Louisiana ត្រូវបានបញ្ជូនទៅកាន់មន្ទីរពេទ្យ ដោយមានការឆ្លងជំងឺគ្រុនផ្តាសាយបក្សី ជាករណីធ្ងន់ធ្ងរដំបូងលើមនុស្សនៅក្នុងសហរដ្ឋអាមេរិក ខណៈការពព្រួយបារម្ភកើនឡើង ពីការរាលដាលជំងឺគ្រុនផ្តាសាយបក្សី។

ករណីថ្មីនេះ បាននាំឲ្យចំនួនសរុបនៃការឆ្លងនៅក្នុងសហរដ្ឋអាមេរិកអំឡុងពេលការផ្ទុះឡើងឆ្នាំ ២០២៤ បច្ចុប្បន្ននេះឡើងដល់៦១ករណី ដោយអ្នកជំងឺផ្សេងៗទៀត មានរោគសញ្ញាស្រាល ដែលពួកគេបានជាសះស្បើយនៅតាមលំនៅឋាន។

ភាពធ្ងន់ធ្ងរនៃករណីនៅរដ្ឋ Louisiana បានបង្កើនការប្រមាន ដោយប្រកាសករណីស្រដៀងគ្នានេះនៅទូទាំងពិភពលោក ខណៈកាលពីខែមុន ក្មេងជំទង់ម្នាក់ក្នុងប្រទេសកាណាដា ក៏ត្រូវបានគេបញ្ជូនទៅកាន់មន្ទីរពេទ្យ ដោយមានករណីជំងឺគ្រុនផ្ដាសាយបក្សីធ្ងន់ធ្ងរ។

យោងតាមមជ្ឈមណ្ឌលគ្រប់គ្រង និងបង្ការជំងឺរបស់សហរដ្ឋអាមេរិក (CDC)បានឲ្យដឹងថា អ្នកជំងឺនៅរដ្ឋ Louisiana បានប៉ះពាល់សត្វបក្សីឈឺ និងងាប់ ក្នុងហ្វូងសត្វនៅខាងក្រោយផ្ទះ។

លោក Demetre Daskalakis មន្ត្រីជាន់ខ្ពស់មជ្ឈមណ្ឌលគ្រប់គ្រង និងបង្ការជំងឺរបស់សហរដ្ឋអាមេរិក (CDC) បាននិយាយថា «ជាង២០ឆ្នាំនៃបទពិសោធន៍សកលជាមួយវីរុសនេះ ករណីឆ្លង H5 កាលពីពេលមុន ត្រូវបានផ្សារភ្ជាប់ទៅនឹងជំងឺធ្ងន់ធ្ងរនៅក្នុងបណ្តាប្រទេសផ្សេងទៀត រួមទាំងជំងឺដែលបណ្តាលឱ្យស្លាប់រហូតដល់៥០ភាគរយនៃករណីនេះ»។