សមាជិកសភាកូរ៉េខាងត្បូងមួយរូប បាននិយាយនៅថ្ងៃព្រហស្បតិ៍ (១៩ ធ្នូ) នេះថា យ៉ាងហោចណាស់ទាហានកូរ៉េខាងជើង ១០០នាក់ ដែលដាក់ពង្រាយទៅកាន់ប្រទេសរុស្ស៊ី ត្រូវបានសម្លាប់ និង ១.០០០នាក់ផ្សេងទៀត បានរងរបួសនៅក្នុងការប្រយុទ្ធយ៉ាងខ្លាំងក្លាជាមួយកងកម្លាំងអ៊ុយក្រែន នៅក្នុងតំបន់ព្រំដែន Kursk របស់រុស្ស៊ី។

លោកសមាជិកសភា លី សឹងខ្វុន (Lee Seong-kweun) បានប្រាប់អ្នកយកព័ត៌មានថា ការខាតបង់យ៉ាងធ្ងន់ធ្ងរនេះ បណ្តាលមកពីកង្វះបទពិសោធន៍របស់ទាហានកូរ៉េខាងជើងក្នុងសង្គ្រាមយានដ្រូន និងភាពមិនច្បាស់លាស់នៃសណ្ឋានដីរាបស្មើគ្មានកន្លែងលាក់ខ្លួន ជាទីដែលពួកគេកំពុងចូលរួមប្រយុទ្ធក្នុងសមរភូមិ។

លោក Lee បាននិយាយថា ការប៉ាន់ប្រមាណនេះខុសពីតួលេខប៉ាន់ស្មានរបស់មន្ត្រីយោធាអាមេរិក ដែលបានលើកឡើងថាមានអ្នកស្លាប់ និងរបួស "ច្រើនរយនាក់" ដោយសារតែការវិភាគបែបអភិរក្សនិយមដោយសេវាស៊ើបការណ៍ជាតិ NIS របស់កូរ៉េខាងត្បូង។

កូរ៉េខាងជើង នៅថ្ងៃព្រហស្បតិ៍នេះ បានលើកសរសើរពីប្រសិទ្ធិភាពនៃសម្ព័ន្ធភាពរបស់ខ្លួនជាមួយរុស្ស៊ី ប៉ុន្តែបានបន្តស្ងាត់ស្ងៀមជុំវិញការដាក់ពង្រាយទាហានរបស់ខ្លួន។

របាយការណ៍ពីតួលេខទាហានស្លាប់ចុងក្រោយនេះបានបញ្ជាក់បន្ថែមពីលើការអត្ថាធិប្បាយរបស់មន្ត្រីអាមេរិក និងអ៊ុយក្រែន ដែលថា ការខាតបង់របស់កូរ៉េខាងជើងគឺធ្ងន់ធ្ងរ ហើយថា រុស្ស៊ីកំពុងប្រើប្រាស់ទ័ពទីក្រុងព្យុងយ៉ាងក្នុងចំនួនច្រើននៅតំបន់ Kursk ជាទីដែលអ៊ុយក្រែន បានបើកការវាយលុកឆ្លងព្រំដែនកាលពីខែសីហា៕