ប្រធានអង្គការស្រាវជ្រាវដែលតាមដានអាវុធប្រើក្នុងសង្គ្រាម បាននិយាយកាលពីថ្ងៃពុធ (១៨ ធ្នូ) ថា ប្រទេសកូរ៉េខាងជើង បានបង្ហាញឱ្យឃើញនៅឆ្នាំនេះថា ខ្លួនអាចផលិតមីស៊ីលបាលីស្ទិកជាច្រើនគ្រាប់ និងផ្គត់ផ្គង់ដល់រុស្ស៊ី សម្រាប់ប្រើប្រាស់ប្រឆាំងនឹងអ៊ុយក្រែន ក្នុងរយៈពេលត្រឹមតែប៉ុន្មានខែប៉ុណ្ណោះ។

លោក ចូណា លេហ្វ (Jonah Leff) បានប្រាប់ក្រុមប្រឹក្សាសន្តិសុខអង្គការសហប្រជាជាតិថា ក្រុមអ្នកស្រាវជ្រាវនៅទីក្រុងគីវ បានពិនិត្យសំណល់នៃមីស៊ីល ៤គ្រាប់ ពីកូរ៉េខាងជើង ដែលបានរកឃើញនៅអ៊ុយក្រែន ក្នុងខែកក្កដា និងសីហា រួមទាំងមួយគ្រប់មានសញ្ញាសម្គាល់ថាត្រូវបានផលិតក្នុងឆ្នាំ២០២៤ នេះ។

លោកបាននិយាយថា៖ «នេះជាភ័ស្តុតាងសាធារណៈដំបូងបង្អស់នៃមីស៊ីលដែលត្រូវបានផលិតនៅកូរ៉េខាងជើង ហើយបន្ទាប់មកត្រូវបានប្រើលើដីអ៊ុយក្រែន ក្នុងរយៈពេលត្រឹមប៉ុន្មានខែប៉ុណ្ណោះ មិនមែនប៉ុន្មានឆ្នាំនោះទេ»។

ឯកអគ្គរដ្ឋទូតរុស្ស៊ី របស់អង្គការសហប្រជាជាតិ លោក វ៉ាស៊ីលី នេបិនសៀ (Vassily Nebenzia) បានជំទាស់នឹងការលើកឡើងរបស់លោក Leff ដោយអះអាងថាលោកជាអ្នកតំណាងឱ្យអង្គការណាតូ និងសហភាពអឺរ៉ុប ហើយបានចោទសួរពីភាពមិនលម្អៀងនៅក្នុងការវាយតម្លៃនោះ។

គួរបញ្ជាក់ថា មេដឹកនាំកូរ៉េខាងជើង លោក Kim Jong Un បានប្តេជ្ញាថា ទីក្រុងព្យុងយ៉ាង នឹង "គាំទ្រជានិច្ច" លើសង្គ្រាមរុស្ស៊ី នៅអ៊ុយក្រែន ក្នុងពេលជំនួបជាមួយប្រមុខការពារជាតិរុស្ស៊ី នៅចុងខែវិច្ឆិកា៕