ក្រុមគ្រួសារចំណាប់ថ្នូរដែលជាប់ឃុំខ្លួននៅតំបន់ហ្កាហ្សា កំពុងប្រឹងប្រែងធ្វើគ្រប់បែបយ៉ាងដើម្បីជួយសង្គ្រោះមនុស្សជាទីស្រឡាញ់របស់ពួកគេចេញពីការចាប់ខ្លួនរបស់ក្រុមហាម៉ាស ខណៈមានអ្នកខ្លះភ័យខ្លាចអំពីសុវត្ថិភាពរបស់ពួកគេ ទោះបីមានការរីកចម្រើនឆ្ពោះទៅរកកិច្ចព្រមព្រៀងបទឈប់បាញ់ ដែលនឹងមើលឃើញការដោះលែងចំណាប់ថ្នូរក៏ដោយ។

មនុស្សជាច្រើនបារម្ភថា កិច្ចព្រមព្រៀងនោះអាចបរាជ័យ ឬសាច់ញាតិរបស់ពួកគេអាចស្លាប់ មុននឹងមានការដោះលែង។ ក្រុមគ្រួសារចំណាប់ថ្នូរហ្កាហ្សា នៅតែមានភាពមិនច្បាស់លាស់ និងរកមិនឃើញក្ដីសង្ឈឹមអ្វីឡើយ ចំពោះរបាយការណ៍ដែលថាកិច្ចចរចាឈានទៅរកកិច្ចព្រមព្រៀងមួយកំពុងបន្ត។

កិច្ចចរចាបទឈប់បាញ់ថ្មីនេះ ជាស្ថានការណ៍ចុងក្រោយបំផុតនៅក្នុងពេលជាង ១៤ខែនៃភាពឈឺចាប់ ការទន្ទឹងរង់ចាំទាំងអស់សង្ឃឹម និងភាពមិនច្បាស់លាស់ អំពីជោគវាសនារបស់ចំណាប់ថ្នូរ។ ទោះយ៉ាងណា ក្រុមគ្រួសារជាច្រើននៅតែបន្តប្រាប់ខ្លួនឯងថា សេរីភាពរបស់សាច់ញាតិពួកគេអាចទៅរួច ទោះបីជាពិភពលោកកំពុងបង្វែរចំណាប់អារម្មណ៍ទៅរកវិបត្តិផ្សេងទៀតក៏ដោយ។

គួររម្លឹកថា ក្រុមសកម្មប្រយុទ្ធដឹកនាំដោយក្រុមហាម៉ាស បានសម្លាប់មនុស្សប្រមាណ ១.២០០នាក់ និងចាប់ខ្លួនមនុស្សជាង ២៥០នាក់ ក្នុងអំឡុងការវាយប្រហាររបស់ពួកគេកាលពីថ្ងៃទី០៧ ខែតុលា ឆ្នាំ២០២៣ លើអ៊ីស្រាអែល នេះបើយោងតាមចំនួនសរុបរបស់អ៊ីស្រាអែល។ ចំណាប់ថ្នូរជាង ១០០នាក់ ត្រូវបានដោះលែងតាមរយៈការចរចា ឬប្រតិបត្តិការជួយសង្គ្រោះរបស់យោធាអ៊ីស្រាអែល។ ក្នុងចំណោមមនុស្សប្រហែល ១០០នាក់ ដែលនៅតែឃុំខ្លួននៅហ្កាហ្សា មានតែប្រហែលពាក់កណ្តាលប៉ុណ្ណោះដែលគេជឿថានៅមានជីវិត៕