រដ្ឋមន្ត្រីការពារជាតិអង់គ្លេស លោក John Healey បាននិយាយកាលពីថ្ងៃពុធថា ចក្រភពអង់គ្លេស កំពុងពង្រឹងការគាំទ្រផ្នែកយោធារបស់ខ្លួនដល់អ៊ុយក្រែន ជាមួយនឹងកញ្ចប់ជំនួយថ្មីមួយ ដែលរួមមានយានដ្រូន របស់កងទ័ពជើងទឹក ប្រព័ន្ធការពារដែនអាកាស និងកាំភ្លើងធំ។

លោក Healey បានថ្លែងនៅក្នុងបទសម្ភាសន៍ជាមួយទីភ្នាក់ងារសារព័ត៌មាន Ukrinform របស់រដ្ឋអ៊ុយ ក្រែនថា ការបណ្តុះបណ្តាលសម្រាប់ទាហានអ៊ុយក្រែន ក្រោមប្រតិបត្តិការ Interflex ដែលជាប្រតិបត្តិការយោធាពហុជាតិដឹកនាំដោយចក្រភពអង់គ្លេស នឹងបន្តនៅឆ្នាំ ២០២៥ ដោយមិនគិតពីការវិវឌ្ឍនៅក្នុងដំណើរការសន្តិភាពរបស់អ៊ុយក្រែន និងបទឈប់បាញ់ដែលអាចកើតមានទេ។

ទោះបីជាយ៉ាងណាក៏ដោយ លោកបាននិយាយថា វាលឿនពេកក្នុងការពិភាក្សាជាសាធារណៈអំពីលទ្ធភាពនៃការគាំទ្ររបស់អង់គ្លេសសម្រាប់ការដាក់ពង្រាយកងកម្លាំងរក្សាសន្តិភាពអន្តរជាតិ នៅក្នុងប្រទេសអ៊ុយក្រែន។

ប្រព័ន្ធផ្សព្វផ្សាយក្នុងស្រុក បានរាយការណ៍ថា លោក Healey បានមកដល់ទីក្រុងគីវ កាលពីព្រឹកថ្ងៃពុធ។

នៅថ្ងៃដដែល រដ្ឋមន្ត្រីការពារជាតិអ៊ុយក្រែន Rustem Umerov បានសរសេរនៅលើគេហទំព័រហ្វេសប៊ុក ថា លោកបានពិភាក្សាជាមួយលោក Healey អំពីការពង្រឹងការការពារដែនអាកាសរបស់អ៊ុយក្រែន ធានាការផ្គត់ផ្គង់គ្រាប់កាំភ្លើងធំដែលមិនមានការរំខាន និងសិក្សាគម្រោងការពាររួមគ្នា។

លោកបាននិយាយថា ប្រធានបទសំខាន់មួយ គឺការសហការផលិតប្រព័ន្ធការពារដែនអាកាស ដោយលោកបានបន្ថែមថា ការពិភាក្សាក៏គ្របដណ្តប់លើការប្រើប្រាស់មីស៊ីល Storm Shadow និងការបំពាក់និង បណ្តុះបណ្តាលកងពលតូចថ្មីៗរបស់កងទ័ពអ៊ុយក្រែនផងដែរ។