ក្រុមអ្នកតាំងលំនៅអ៊ីស្រាអែល បានឆ្លងចូលទៅក្នុងទឹកដីលីបង់កាលពីថ្ងៃពុធ ដោយចូលទៅកាន់ទីប្រជុំជនព្រំដែន Maroun Al-Ras ក្នុងឧប្បត្តិហេតុដ៏សំខាន់មួយ។ក្រុមនេះ បានសង់តង់ និងថតរូបរបស់ខ្លួន នៅក្នុងតំបន់នោះ។

កងទ័ពអ៊ីស្រាអែល ដែលមានវត្តមាននៅក្នុងទឹកដីលីបង់ ចាប់តាំងពីថ្ងៃទី ០១ ខែតុលា ហើយនៅតែស្ថិតក្នុងតំបន់ព្រំដែន បាននិយាយថា «បញ្ហាដ៏ធ្ងន់ធ្ងរ» កំពុងត្រូវបានស៊ើបអង្កេត។

រូបថតជាច្រើនដែលថតដោយអ្នកតាំងលំនៅ បានបង្ហាញតង់ពីរ និងបុរសមួយក្រុមរួមជាមួយក្មេងពីរនាក់។ ក្រុមនេះ បានលើកបដាដែលមានរូបផ្កាយ(Star of David) ជានិមិត្តរូបសម្គាល់អត្តសញ្ញាណជនជាតិ ជ្វីហ្វ ជាមួយនឹងដើមស៊ីដា( cedar)លីបង់ ដែលជានិមិត្តរូបនៃទង់ជាតិលីបង់ បង្ហាញយ៉ាងច្បាស់នៅ កណ្តាលទីតាំងនោះ។

ក្រោយមកគេបានឃើញថា អ្នកតាំងលំនៅម្នាក់ក្នុងចំណោមអ្នកតាំងលំនៅថ្មីៗ បានចែករំលែកវីដេអូនៅលើប្រព័ន្ធផ្សព្វផ្សាយសង្គម ដែលគាត់ប្រាប់កូនគាត់ ដែលមកជាមួយថា លីបង់ជារបស់អ៊ីស្រាអែល។ វីដេអូនេះ ធ្លាប់បានបង្កឲ្យផ្ទុះកំហឹងរាលដាល នៅក្នុងប្រទេសលីបង់។

ការបំពានរបស់អ៊ីស្រាអែល បានពង្រីកដល់តំបន់ក្បែរទីតាំងដែលជាកម្មសិទ្ធិរបស់កងកម្លាំងបណ្តោះអាសន្នរបស់អង្គការសហប្រជាជាតិនៅប្រទេសលីបង់ (UNIFIL) ដែលប្រតិបត្តិការនៅភាគខាងត្បូងនៃទន្លេ Litani។

សេចក្តីថ្លែងការណ៍របស់ UNIFIL បានរាយការណ៍ថា៖«សកម្មភាពរបស់កងទ័ពអ៊ីស្រាអែល នៅជិតទីតាំងមួយរបស់យើងនៅក្នុងទីប្រជុំជន Maroun Al-Ras ដោយពណ៌នាឧបទ្ទវហេតុនេះថា«ពិតជាគ្រោះថ្នាក់ និងមិនអាចទទួលយកបាន ព្រោះវាធ្វើឲ្យប៉ះពាល់ដល់សុវត្ថិភាពបុគ្គលិករបស់យើង»។