​ម៉ូតូ​ទឹក៖ កីឡា​ករ​ម៉ូតូ​ទឹក​ឆ្នើម​កម្ពុជា សាលី អ៊ូ​មើ​ត ដណ្ដើមបាន​ចំណាត់ថ្នាក់​លេខ​១ ក្នុង​ជុំ​ទី​១ នៃ​ការប្រកួត​កីឡា​ម៉ូតូ​ទឹក​ពានរង្វាន់​អន្ដរជាតិ Jet Ski Pro Tour 2021 នៅ​ប្រទេស​ថៃកាលពី​ចុង​សប្ដាហ៍​កន្លងទៅ។​ ​ម្ចាស់​មេដាយមាស​កីឡា​អាស៊ីឆ្នាំ​២០២១៨ រូបនេះបាន​ឲ្យ​ដឹង​ថា ព្រឹត្តិការណ៍​នេះបែង​ចែង​ការប្រកួត​ជា ៤​ជុំដោយ​ជុំ​ទី​១ បាន​ប្រកួត​កាលពី​ថ្ងៃទី​៣០-៣១ ខែតុលា​ចុង​សប្ដាហ៍​កន្លងទៅដោយមាន​កីឡាករ ៥​ប្រទេស​ចូលរួម រួមមាន​ម្ចាស់ផ្ទះ​ថៃ អាមេរិក អាល្លឺម៉ង់ ឡាវ និង​កម្ពុជា។ ចំពោះ​កីឡាករ​កម្ពុ​ជាមាន ៥​នាក់ដែល​ប្រកួត​លើ ៣វិញ្ញាសា​ផ្សេងគ្នា។​

​ប៉ុន្ដែ​ក្នុងចំណោម​កីឡាករ​កម្ពុជា​ទាំង ៥​រូបមានតែ សាលី អ៊ូ​មើ​ត ម្នាក់​ប៉ុណ្ណោះដែល​ដណ្ដើមបាន​ចំណាត់ថ្នាក់​លេខ​១ ខណៈ ៤​នាក់​ទៀតទទួលបាន​លេខ​៦ និង​លេខ​៧ បន្ទាប់ពី​មាន​កីឡាករ​ខ្លះ​ជួប​បញ្ហា​ប៉ះទង្គិច​គ្នា​ជាមួយ​គូប្រជែង​ក្នុង​ទីលាន​ប្រកួត។ យ៉ាងណាមិញ អ៊ូ​មើ​ត បានបង្ហាញ​សុទិដ្ឋិនិយមចំពោះ​លទ្ធផល​នេះគឺជា​សញ្ញាណ​វិជ្ជមាន​មួយ សម្រាប់​ក្រុម​ម៉ូតូ​ទឹក​កម្ពុជាក្នុង​ដំណើរ​ឆ្ពោះទៅ​ស៊ី​ហ្គេមឆ្នាំ​២០២៣ ។​​ ​គួរ​បញ្ជាក់ថា ចំពោះ​បេក្ខភាព​កីឡាករ​ម៉ូតូ​ទឹក​កម្ពុជាដែល​បាន​ចូលរួម​ព្រឹត្តិការណ៍ Jet Ski Pro Tour 2021 រួមមាន​កីឡាករ សាលី អ៊ូ​មើ​ត និង ម៉ី​ន មូ​ស្តា​ន ប្រកួត​វិញ្ញាសា Pro Am Ski Modified តែ មូ​ស្ដា​ន ទទួលបាន​លេខ​៦។ រីឯ​កីឡាករ ម៉ី​ន អូស្មាន និង កៃ វ៉ាន់​ស៊ីន​ដែន ប្រកួត​វិញ្ញាសា Novice Ski ជាមួយគ្នាទទួលបាន​លេខ​៦ និង​លេខ​៧។ រីឯ​កីឡាករ សាលី ហ្វី​លីន ប្រកួត​វិញ្ញាសា Novice Runabout 1100 Stock ទទួលបាន​លេខ​៦។​

​ចំពោះ​ការប្រកួត​ជុំ​ទី​២ នៃ​ព្រឹត្តិការណ៍​ប្រណាំង​ម៉ូតូ​ទឹក​ពានរង្វាន់​អន្ដរជាតិ​នេះគ្រោង​ធ្វើឡើង​នា​ថ្ងៃទី​២០-២១ ខែវិច្ឆិកា​ខាងមុខ ដោយ សាលី អ៊ូ​មើ​ត និង​សិស្ស​ប្អូន ៤​រូប​ផ្សេងទៀតបានដាក់​គោលដៅ​ខំប្រឹង​ឲ្យ​អស់ពី​សមត្ថភាព ដើម្បី​ដណ្ដើមពាន និង​លទ្ធផល​ល្អ​ជូន​ជាតិ ពិសេស​គឺ​ដើម្បី​ពង្រឹងសមត្ថភាព ក៏ដូចជា​វាស់​ស្ទង់​សមត្ថភាព​ជាមួយ​កីឡាករ​ក្នុង​តំបន់ត្រៀម​ឆ្ពោះទៅ​ស៊ី​ហ្គេមឆ្នាំ​២០២៣ នៅ​កម្ពុជាតែម្ដង៕

​អត្ថបទ៖ លី ឈុន​ឡា