សារព័ត៌មាន Al Jazeera បានរាយការណ៍ដោយដកស្រង់របាយការណ៍របស់ការិយាល័យអង្គការសហប្រជាជាតិសម្រាប់ការសម្របសម្រួលកិច្ចការមនុស្សធម៌ (OCHA)ថា កងកម្លាំងការពារអ៊ីស្រាអែល (IDF) បានវាយប្រហារសាលារៀន នៅតំបន់ហ្កាហ្សាស្ទ្រីបជិត ១០០លើក ក្នុងរយៈពេលពីរខែ កន្លងទៅនេះ។

OCHA ជូនដំណឹងថា ទីភ្នាក់ងារអង្គការសហប្រជាជាតិ បានចងក្រងឯកសារនៃការវាយប្រហាររបស់អ៊ីស្រាអែលចំនួន ៩៥លើក លើអគារសិក្សា នៅក្នុងដែនដីដែលមានជម្លោះ នៅចន្លោះថ្ងៃទី ០៦ ខែតុលា ដល់ថ្ងៃទី ១៥ ខែធ្នូ។ ភាគច្រើននៃអគារទាំងនេះ បានបម្រើជាជម្រកសម្រាប់ប្រជាជនប៉ាឡេស្ទីន ដែលផ្លាស់ទីលំនៅ។ របាយការណ៍នោះ បានកត់សម្គាល់ថា ការវាយប្រហាររួមមាន «ឧប្បត្តិហេតុចំនួន ៦១លើក នៅក្នុងខេត្តហ្កាហ្សាខាងជើង។ នៅថ្ងៃទី ១៤ និង ១៥ ខែធ្នូ សាលារៀនចំនួន ៤ ត្រូវបានវាយប្រហារ។

ភាពតានតឹង បានផ្ទុះឡើងម្តងទៀតនៅមជ្ឈិមបូព៌ានៅថ្ងៃទី ០៧ ខែតុលា ឆ្នាំ ២០២៣ នៅពេលដែលក្រុមយុទ្ធជនមកពីចលនាបដិវត្តន៍ប៉ាឡេស្ទីនហាម៉ាសដែលមានមូលដ្ឋាននៅតំបន់ហ្កាហ្សាស្ទ្រីប បានធ្វើការវាយប្រហារដ៏គួរឲ្យភ្ញាក់ផ្អើលមួយលើទឹកដីអ៊ីស្រាអែលពីតំបន់ហ្កាហ្សា ដោយបានសម្លាប់អ្នកស្រុករស់នៅតាមព្រំដែនអ៊ីស្រាអែល និងចាប់ចំណាប់ថ្នូរជាង ២៤០នាក់ ។ ជាការសងសឹក អ៊ីស្រាអ៊ែល បានបើកប្រតិបត្តិការយោធាមួយ នៅក្នុងដែនដីនេះ ដើម្បីបំផ្លាញរចនាសម្ព័ន្ធយោធា និងនយោបាយរបស់ក្រុមហាម៉ាស និងរំដោះចំណាប់ថ្នូរទាំងនោះ។ អរិភាពនៅតំបន់ហ្កាហ្សាស្ទ្រីប និងផ្នែកខ្លះនៃប្រទេសលីបង់ និងស៊ីរី នៅតែបន្ត រហូតមកដល់សព្វថ្ងៃនេះ។