រុស្ស៊ីបាននិយាយកាលពីថ្ងៃពុធថា ខ្លួនបានឃុំខ្លួនពលរដ្ឋអ៊ូសបេគីស្ថានម្នាក់ ដែលបានសារភាពថា បានបំផ្ទុះគ្រាប់បែក ដែលបានសម្លាប់ឧត្តមសេនីយ៍ទោ Igor Kirillov នៅទីក្រុងមូស្គូ កាលពីថ្ងៃអង្គារ តាមការណែនាំរបស់សេវាសន្តិសុខអ៊ុយក្រែន។

លោក Kirillov ដែលជាកងទ័ពការពារជាតិវិទ្យុសកម្ម គីមី និងជីវសាស្រ្តរបស់រុស្ស៊ី ត្រូវបានសម្លាប់នៅខាងក្រៅអគារផ្ទះល្វែងរបស់គាត់ រួមជាមួយនឹងជំនួយការរបស់គាត់ នៅពេលដែលគ្រាប់បែក ដែលលាក់ទុក នៅក្នុងម៉ូតូអគ្គិសនីមួយគ្រឿង បានផ្ទុះឡើង។

លោកគឺជាមន្ត្រីយោធាជាន់ខ្ពស់បំផុតរបស់រុស្ស៊ី ដែលត្រូវបានធ្វើឃាត នៅក្នុងប្រទេសរុស្ស៊ី ដោយអ៊ុយក្រែន។ សេវាចារកម្ម SBU របស់ប្រទេសអ៊ុយក្រែន ដែលបានចោទប្រកាន់លោក Kirillov ថា ជាអ្នកទទួលខុសត្រូវចំពោះការប្រើប្រាស់អាវុធគីមីប្រឆាំងនឹងកងទ័ពអ៊ុយក្រែន ជាអ្វីដែលទីក្រុងមូស្គូបដិសេធនោះ បានទទួលខុសត្រូវចំពោះការសម្លាប់នេះ។

គណៈកម្មាធិការស៊ើបអង្កេតរបស់រុស្ស៊ី ដែលស៊ើបអង្កេតឧក្រិដ្ឋកម្មដ៏ធ្ងន់ធ្ងរ បាននិយាយនៅក្នុងសេចក្តីថ្លែងការណ៍មួយកាលពីថ្ងៃពុធថា ជនសង្ស័យដែលមិនបញ្ចេញឈ្មោះ បានប្រាប់ពួកគេ អំឡុងពេលសាកសួរថា ខ្លួនបានមកទីក្រុងមូស្គូ ជាទីដែលរូបគេ បានទទួលគ្រាប់បែកកែច្នៃសម្រាប់ការវាយប្រហារនេះ។

សេចក្តីថ្លែងការណ៍ បានបញ្ជាក់ថា ជនសង្ស័យនេះ បានពិពណ៌នាអំពីរបៀប ដែលខ្លួនបានដាក់គ្រាប់បែក នៅលើម៉ូតូអគ្គិសនី ដែលខ្លួនបានចត នៅខាងក្រៅច្រកចូលនៃប្លុកផ្ទះល្វែង ដែលលោក Kirillov បានរស់នៅ។