បណ្ដាមេដឹកនាំសហភាពអឺរ៉ុប (EU) មានបំណងបញ្ជូន «សញ្ញាច្បាស់ៗ» ទៅប្រធានាធិបតីជាប់ឆ្នោតរបស់សហរដ្ឋអាមេរិក លោក Donald Trump នៅក្នុងកិច្ចប្រជុំកំពូល នាថ្ងៃព្រហស្បតិ៍ (ទី១៩ ខែធ្នូ) នេះ អំពីការបន្តការគាំទ្ររបស់ពួកគេ ចំពោះប្រទេសអ៊ុយក្រែន ហើយមេដឹកនាំទាំងអស់ក៏នឹងពិភាក្សាផងដែរ អំពីបញ្ហាប្រឈមផ្នែកសន្តិសុខ និងសេដ្ឋកិច្ចដែលបង្កឡើងដោយការវិលត្រលប់របស់លោកទៅកាន់សេតវិមានវិញ។

បើយោងតាមសេចក្តីសន្និដ្ឋានព្រាង បានបង្ហាញថា បណ្ដាមេដឹកនាំប្លុកនេះ នឹងធ្វើជាម្ចាស់ផ្ទះទទួលប្រធានាធិបតីអ៊ុយក្រែន លោក Volodymyr Zelenskiy នៅពេលចាប់ផ្តើមកិច្ចពិភាក្សារបស់ពួកគេ ក្នុងទីក្រុងប្រ៊ុចសែល ប្រទេសបែលហ្ស៊ិក ហើយនឹងបញ្ជាក់សារជាថ្មីនូវ «ការប្តេជ្ញាចិត្តឥតងាករេ» របស់ពួកគេ ចំពោះការគាំទ្រអ៊ុយក្រែន «ដរាបណាប្រទេសនេះនៅតែត្រូវការ»។

គួររំលឹកថា លោក Trump បានអំពាវនាវម្តងហើយម្តងទៀតឲ្យបញ្ចប់ឲ្យបានឆាប់ ចំពោះសង្គ្រាមដែលមានរយៈពេលជិត ៣ឆ្នាំនេះ។ កាលពីថ្ងៃចន្ទដើមសប្ដាហ៍នេះ លោកបាននិយាយថា លោក Zelenskiy គួរតែត្រៀមខ្លួន សម្រាប់ការឈានដល់កិច្ចព្រមព្រៀងសន្តិភាពជាមួយប្រធានាធិបតីរុស្ស៊ី លោក Vladimir Putin ទោះបីជាលោកមិនបានប្រាប់ថា តើនេះមានន័យថា ទីក្រុងគីវត្រូវព្រមប្រគល់ដែនដីទៅឲ្យទីក្រុងមូស្គូជាផ្នែកនៃដំណោះស្រាយដែលត្រូវបានចរចាដែរ ឬយ៉ាងណា។

បច្ចុប្បន្ននេះ កងកម្លាំងរុស្ស៊ីកាន់កាប់ជិត ១ភាគ៥ នៃដែនដីរបស់អ៊ុយក្រែន ហើយកំពុងរុលទៅមុខជាលំដាប់ នៅភាគខាងកើតនៃប្រទេសនេះ។ ហើយសេចក្តីសន្និដ្ឋានព្រាងរបស់ EU បានលើកឡើងថា រុស្ស៊ីមិនត្រូវឈ្នះជាដាច់ខាត» ដោយបន្ថែមថា គ្មានគំនិតផ្តួចផ្តើមណាមួយត្រូវធ្វើឡើង ចំពោះអ៊ុយក្រែន ដោយគ្មានការចូលរួមពីទីក្រុងគីវនោះឡើយ។

អ្នកការទូតសហភាពអឺរ៉ុបម្នាក់ បានពណ៌នាសេចក្តីព្រាងអត្ថបទនេះថា ជាការបញ្ជូន «សញ្ញាច្បាស់ៗទៅសហរដ្ឋអាមេរិក»។ មេដឹកនាំទាំងអស់ក៏នឹងពិភាក្សាគ្នាពីទំនាក់ទំនង សហភាពអឺរ៉ុប-សហរដ្ឋអាមេរិក ឲ្យកាន់ទូលំទូលាយជាងនេះ ពេលអាហារថ្ងៃត្រង់ ចំពេលមានការព្រួយបារម្ភអំពីសង្គ្រាមពាណិជ្ជកម្មឆ្លងមហាសមុទ្រអាត្លង់ទិកដែលអាចកើតមាន៕