នៅឯក្រុមប្រឹក្សាសន្តិសុខអង្គការសហប្រជាជាតិ សហរដ្ឋអាមេរិក កាលពីថ្ងៃពុធ (ទី១៨ ខែធ្នូ) បានប្រកាសអាសន្នថា រុស្ស៊ីជិតយល់ព្រមទទួលយកកូរ៉េខាងជើងមានបំពាក់អាវុធនុយក្លេអ៊ែរ ខណៈដែលទីក្រុងមូស្គូ និងក្រុងព្យុងយ៉ាងការពារកិច្ចសហប្រតិបត្តិការដែលកំពុងវិវត្តទៅមុខជាលំដាប់របស់ខ្លួន។

រដ្ឋមន្ត្រីការបរទេសរុស្ស៊ី លោក Sergei Lavrov បាននិយាយកាលពីខែកញ្ញាថា ទីក្រុងមូស្គូបានចាត់ទុកគំនិតនៃ «ការរំសាយអាវុធនុយក្លេអ៊ែរ» របស់កូរ៉េខាងជើងថា ជាបញ្ហាលែងត្រូវបានពិភាក្សាទៀតហើយ ដោយសារខ្លួនយល់ពីភាពសមហេតុផលរបស់ទីក្រុងព្យុងយ៉ាង ក្នុងការពឹងផ្អែកលើអាវុធនុយក្លេអ៊ែរជាមូលដ្ឋានគ្រឹះ ដើម្បីការពាររបស់ខ្លួន។

ឯកអគ្គរដ្ឋទូតអាមេរិកប្រចាំអង្គការសហប្រជាជាតិ (UN) លោកស្រី Linda Thomas-Greenfield បាននិយាយថា៖ «ជារឿងគួរឲ្យព្រួយបារម្ភណាស់ យើងប៉ាន់ស្មានថា រុស្ស៊ីប្រហែលជាជិតយល់ព្រមទទួលយកកម្មវិធីអាវុធនុយក្លេអ៊ែររបស់កូរ៉េខាងជើងហើយ ដែលនេះផ្ទុយពីការប្តេជ្ញាចិត្តរយៈពេលជាច្រើនទសវត្សរ៍របស់ទីក្រុងមូស្គូ ក្នុងការលុបបំបាត់នុយក្លេអ៊ែរ នៅឧបទ្វីបកូរ៉េ»។

លោកស្រីបានបន្ថែមថា៖ «យើងជឿជាក់ថា ទីក្រុងមូស្គូនឹងកាន់តែស្ទាក់ស្ទើរជាងមុន មិនត្រឹមតែការរិះគន់ដល់ការអភិវឌ្ឍអាវុធនុយក្លេអ៊ែររបស់ទីក្រុងព្យុងយ៉ាងប៉ុណ្ណោះទេ ប៉ុន្តែថែមទាំងរារាំងការអនុម័តទណ្ឌកម្ម ឬសេចក្ដីសម្រេចដែលថ្កោលទោស ចំពោះទង្វើបង្កអស្ថិរភាពរបស់កូរ៉េខាងជើងថែមទៀតផង»។

ទាំងកូរ៉េខាងត្បូង និងអង់គ្លេស បានរិះគន់ការលើកឡើងរបស់លោក Lavrov ដោយនិយាយថា លោកបានធ្វើឲ្យខូចដល់ប្រព័ន្ធច្បាប់មិនរីកសាយភាយពិភពលោក។

ឯកអគ្គរដ្ឋទូតរបស់រុស្សី ប្រចាំនៅ UN លោក Vassily Nebenzia មិនបានសំដៅទៅកម្មវិធីនុយក្លេអ៊ែររបស់កូរ៉េខាងជើងទេ នៅពេលលោកថ្លែងទៅកាន់ក្រុមប្រឹក្សា។ លោកបាននិយាយការពារកិច្ចសហប្រតិបត្តិការដែលកំពុងរីកចម្រើន រវាងទីក្រុងមូស្គូ និងក្រុងព្យុងយ៉ាងថា ជាសិទ្ធិអធិបតេយ្យភាពរបស់រុស្ស៊ី៕