មេធាវីម្នាក់ដែលផ្តល់ប្រឹក្សាដល់លោក Yoon Suk Yeol នៅថ្ងៃព្រហស្បតិ៍ (ទី១៩ ខែធ្នូ) នេះ បាននិយាយថា លោកប្រធានាធិបតីកូរ៉េខាងត្បូងដែលរងការចោទប្រកាន់ មានឆន្ទៈបង្ហាញទស្សនៈរបស់លោកផ្ទាល់ អំឡុងដំណើរការផ្លូវច្បាប់ ទាក់ទងនឹងការប្រកាសច្បាប់អាជ្ញាសឹករយៈពេលខ្លីរបស់លោក។

មេធាវី គឺលោក Seok Dong-hyeon ក៏បានប្រាប់អ្នកសារព័ត៌មានដែរថា ការស៊ើបអង្កេតជាច្រើនដែលហាក់ដូចជាមានភាពជាន់គ្នាពាក់ព័ន្ធនឹងលោក Yoon គួរតែត្រូវបានសម្រួល។

គួរបញ្ជាក់ថា លោក Yoon ដែលជាអតីតរដ្ឋអាជ្ញា បានធ្វើឲ្យប្រទេសជាតិភ្ញាក់ផ្អើល កាលពីថ្ងៃទី៣ ខែធ្នូ នៅពេលដែលគាត់បានប្រកាសច្បាប់អាជ្ញាសឹកនៅក្នុងសុន្ទរកថាតាមទូរទស្សន៍ នាពេលយប់ មុននឹងលុបចោលវិញប៉ុន្មានម៉ោងក្រោយមក បន្ទាប់ពីសមាជិកសភាដែលពេញដោយកំហឹង បានច្រានចោលក្រឹត្យរបស់លោក។

អមដោយការបន្ថែមថា លោក Yoon មិនដែលគិតបះបោរនោះ លោក Seok បានប្រាប់សន្និសីទសារព័ត៌មានមួយថា៖ «គាត់ (លោក Yoon) បានសុំអភ័យទោសរួចហើយ ជុំវិញការធ្វើឲ្យភ្ញាក់ផ្អើល និងការបង្កការតក់ស្លុតដល់សាធារណជន ហើយលោកនៅតែសុំអភ័យទោស ចំពោះរឿងនោះ ប៉ុន្តែលោកមានជំហរច្បាស់លាស់ និងជឿជាក់លើបញ្ហាចម្រូងចម្រាសនេះ ហើយត្រូវតែដោះស្រាយ»។

លោក Yoon ត្រូវបានសភាចោទប្រកាន់ ក្នុងការបោះឆ្នោតកាលពីថ្ងៃទី១៤ ខែធ្នូ ជុំវិញការដាក់ច្បាប់អាជ្ញាសឹករបស់លោក ហើយប្រឈមនឹងការជំនុំជម្រះក្តីរបស់តុលាការធម្មនុញ្ញ ជុំវិញថា តើត្រូវដកលោកចេញពីតំណែង ឬផ្ដល់អំណាចប្រធានាធិបតីរបស់លោកឡើងវិញ។

ជាមួយគ្នានេះ លោក Yoon ក៏ប្រឈមនឹងការស៊ើបអង្កេត ជុំវិញថា តើការប្រកាសច្បាប់អាជ្ញាសឹកបង្កើតជាការបះបោរដែរ ឬទេ ជាការចោទប្រកាន់មួយក្នុងចំណោមការចោទប្រកាន់មួយចំនួនដែលប្រធានាធិបតីកូរ៉េខាងត្បូងមិនមានអភ័យឯកសិទ្ធិ៕