នាយករដ្ឋមន្ត្រីវៀតណាម នៅថ្ងៃព្រហស្បតិ៍ (ទី១៩ ខែធ្នូ) នេះ បានលើកឡើងថា ប្រទេសវៀតណាមចង់ពង្រីកកិច្ចសហប្រតិបត្តិការការពារជាតិអន្តរជាតិរបស់ខ្លួន ដើម្បីបង្កើតបាននូវទំនុកចិត្ត និងទប់ស្កាត់សង្គ្រាម ហើយសហរដ្ឋអាមេរិក បានប្រាប់ថា ខ្លួនសង្ឃឹមថា ឧស្សាហកម្មការពារជាតិរបស់ខ្លួន អាចដើរតួនាទីយ៉ាងសំខាន់។

ក្នុងសុន្ទរកថាបើកពិព័រណ៍អាវុធអន្តរជាតិលើកទី២ របស់វៀតណាម នាយករដ្ឋមន្ត្រី លោក Pham Minh Chinh បានថ្លែងថា ពិព័រណ៍នេះជាសារសន្តិភាព កិច្ចសហប្រតិបត្តិការ និងការអភិវឌ្ឍ។

ពិព័រណ៌អាវុធដែលនឹងដំណើរការរហូតដល់ថ្ងៃទី២២ ខែធ្នូ កំពុងត្រូវបានរៀបចំឡើងនៅឯអាកាសយានដ្ឋាន Gia Lam ក្នុងទីក្រុងហាណូយ ដោយមានអ្នកតាំងពិព័រណ៍ជិត ២៥០ស្ថាប័ន មកពីរាប់សិបប្រទេស ក្នុងនោះរួមមានទាំងសហរដ្ឋអាមេរិក ចិន រុស្ស៊ី អង់គ្លេស អ៊ីរ៉ង់ និងអ៊ីស្រាអែលផងដែរ។

លោក Chinh បាននិយាយថា វៀតណាមនឹងរក្សាគោលនយោបាយ «ទេ ៤ចំណុច» របស់ខ្លួន ដែលមានដូចជា មិនចូលរួមក្នុងសម្ព័ន្ធភាពយោធា មិនសម្របតាមប្រទេសមួយ ដើម្បីប្រឆាំងប្រទេសមួយផ្សេងទៀត មិនអនុញ្ញាតឲ្យមានមូលដ្ឋានយោធាបរទេស ឬប្រើប្រាស់ដែនដីរបស់ខ្លួនប្រឆាំងនឹងប្រទេសមួយផ្សេងទៀត ហើយនិងមិនប្រើប្រាស់កម្លាំង ឬការគំរាមកំហែងនៃកម្លាំងនោះ នៅក្នុងទំនាក់ទំនងអន្តរជាតិ។

នៅខាងក្រៅកម្មវិធីតាំងពិព័រណ៍នេះ ឯកអគ្គរដ្ឋទូតសហរដ្ឋអាមេរិកប្រចាំនៅវៀតណាម លោក Marc Knapper បាននិយាយថា ក្រុមហ៊ុនការពារជាតិអាមេរិក អាចសហការជាមួយសមភាគីវៀតណាម ក្នុងវិស័យជាច្រើន ក្នុងនោះរួមទាំងការផលិតរួមគ្នា និងការផ្ទេរបច្ចេកវិទ្យាផងដែរ៕