ក្រសួងការបរទេសចិន បានជំរុញឲ្យសហរដ្ឋអាមេរិកបញ្ឈប់ការចេញផ្សាយ «របាយការណ៍មិនទទួលខុសត្រូវ« បន្ទាប់ពីមន្ទីរបញ្ចកោណ បានលើកឡើងថា អំពើពុករលួយនៅក្នុងវិស័យយោធាចិន អាចរំខានដល់គោលដៅទំនើបកម្មយោធារបស់ប្រទេសនេះ។

អំឡុងសន្និសីទសារព័ត៌មាន នាថ្ងៃព្រហស្បតិ៍ (ទី១៩ ខែធ្នូ) នេះ អ្នកនាំពាក្យក្រសួង លោក Lin Jian បាននិយាយថា របាយការណ៍នេះ មិនអើពើនឹងការពិតជាក់ស្ដែង ហើយពោរពេញទៅដោយភាពលម្អៀង។

នៅក្នុងរបាយការណ៍ប្រចាំឆ្នាំរបស់ខ្លួន ស្តីពីយោធារបស់ទីក្រុងប៉េកាំងដែលត្រូវបានចេញផ្សាយកាលពីថ្ងៃពុធ (ទី១៨ ខែធ្នូ) មន្ទីរបញ្ចកោណបានរៀបរាប់ថា អំពើពុករលួយក្នុងវិស័យយោធារបស់ប្រទេសចិន អាចនឹងរំខានដល់វឌ្ឍនភាពរបស់ប្រទេសនេះ ក្នុងការឆ្ពោះទៅរកគោលដៅទំនើបកម្មយោធាឆ្នាំ២០២៧ របស់ខ្លួន។

គួរបញ្ជាក់ថា ចាប់តាំងពីឆ្នាំមុនមក យោធារបស់ប្រទេសចិនបានជួបប្រទះនឹងការបោសសម្អាតប្រឆាំងអំពើពុករលួយយ៉ាងទូលំទូលាយ ហើយកាលពីខែមុន ក្រសួងការពារជាតិ បានឲ្យដឹងថា មន្ត្រីយោធាលំដាប់ខ្ពស់មួយរូប ត្រូវបានព្យួរការងារ ហើយកំពុងស្ថិតនៅក្រោមការស៊ើបអង្កេតពីបទ «បំពានវិន័យយ៉ាងធ្ងន់ធ្ងរ»។

របាយការណ៍ដ៏ទូលំទូលាយរបស់មន្ទីរបញ្ចកោណ បានឲ្យដឹងថា នៅចន្លោះខែកក្កដា ដល់ខែធ្នូ ឆ្នាំ២០២៣ យ៉ាងហោចណាស់មន្ត្រីយោធាជាន់ខ្ពស់ និងនាយកប្រតិបត្តិឧស្សាហកម្មការពារជាតិចិនចំនួន ១៥នាក់ ត្រូវបានដកចេញពីមុខតំណែងរបស់ពួកគេ៕