ស៊ីហ្គេម៖ សម្ដេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និងជាប្រធានគណៈកម្មាធិការជាតិ រៀបចំការប្រកួតកីឡាស៊ីហ្គេមលើកទី៣២ ឆ្នាំ២០២៣ ឬហៅកាត់ថា CAMSOC បានកំណត់ ២ទីតាំងដើម្បីរៀបចំពិធីសុំភ្លើងអាទិទេព សម្រាប់រត់ភ្លើងគប់ឆ្ពោះទៅរកពិធីបើក ការប្រកួតកីឡាស៊ីហ្គេម និងអាស៊ានប៉ារ៉ាហ្គេមឆ្នាំ២០២៣ ទី១-នៅប្រាសាទអង្គរវត្ត និងទី២-នៅព្រះបរមរាជវាំង។
ឯកឧត្ដម វ៉ាត់ ចំរើន អគ្គលេខាធិការ CAMSOC បានបញ្ជាក់ថា ការកំណត់ទីតាំងរៀបចំពិធីសុំភ្លើងអាទិទេពនេះ គឺគោរពតាមលំនាំប្រវត្តិពិធីបើកព្រឹត្តិការណ៍កីឡាអូឡាំពិកលើកដំបូង ដែលត្រូវបានគេរៀបចំសុំភ្លើងអាទិទេពនៅលើភ្នំអូឡាំព្យ៉ាដ។ ដូច្នេះកម្ពុជាក៏មានកន្លែងអច្ឆរិយដ៏អស្ចារ្យ ដែលរៀបចំពិធីបែបសាសនានេះបានដូចគ្នា គឺនៅប្រាសាទអង្គរវត្ត។ រីឯនៅព្រះបរមរាជវាំងក៏អាចរៀបចំបានដែរ។ ហេតុនេះថ្នាក់ដឹកនាំកំពុងរៀបចំស្នើសុំ ទៅសម្ដេចតេជោនាយករដ្ឋមន្ដ្រី ដើម្បីធ្វើការសម្រេច។
គួរបញ្ជាក់ថា ក្រោយពិធីសុំភ្លើងអាទិទេព CAMSOC នឹងរៀបចំពិធីដ៏ធំមួយទៀត គឺការរត់ភ្លើងគប់ឆ្លងកាត់គ្រប់ប្រទេសក្នុងតំបន់អាស៊ាន ដើម្បីផ្សព្វផ្សាយពីការត្រៀមខ្លួនរួចរាល់ក្នុងការធ្វើម្ចាស់ផ្ទះ ការប្រកួតកីឡាស៊ីហ្គេមឆ្នាំ២០២៣ នៅកម្ពុជា ក្រោមកិច្ចសហការជាមួយទូតកម្ពុជា ប្រចាំបណ្ដាប្រទេសនីមួយៗក្នុងអាស៊ាន មុនរត់ចូលមកក្នុងប្រទេសកម្ពុជា ហើយបន្តរត់ជុំវិញបឹងទន្លេសាបរហូតដល់ល្ងាចទី០៥ ខែឧសភា ឆ្នាំ២០២៣ ដែលជាពេលវេលារៀបចំពិធីអុចភ្លើងគប់ និងប្រកាសបើកការប្រកួតកីឡាស៊ីហ្គេមឆ្នាំ២០២៣ តែម្ដង៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
