សភាជាន់ទាបរបស់ប្រទេសអាល្លឺម៉ង់ នៅថ្ងៃព្រហស្បតិ៍ (ទី១៩ ខែធ្នូ) នេះ បានអនុម័តច្បាប់ ដើម្បីការពារតុលាការជាន់ខ្ពស់កុំឲ្យមានការជ្រៀតជ្រែកផ្នែកនយោបាយ ជាការឆ្លើយតបទៅនឹងក្ដីបារម្ភអំពីការប៉ុនប៉ងដែលអាចកើតមាន ពីសំណាក់គណបក្សស្តាំនិយមជ្រុល ដើម្បីធ្វើឲ្យស្ថាប័នចុះខ្សោយ។

ច្បាប់ដែលប្រញាប់ប្រញាល់ឆ្លងកាត់សភាជាន់ទាប Bundestag នៅមុនការបោះឆ្នោតមុនអាណត្តិ នាខែកុម្ភៈ ក្រោយការដួលរលំនៃរដ្ឋាភិបាលរបស់អធិការបតី លោក Olaf Scholz កើតឡើងបន្ទាប់ពីប្រទេសហុងគ្រី និងប៉ូឡូញ បានអនុម័តកំណែទម្រង់ប្រព័ន្ធតុលាការ ជាអ្វីដែលធ្វើឲ្យមានការភ្ញាក់ផ្អើលដល់ដៃគូសហភាពអឺរ៉ុបរបស់ពួកគេ។

ច្បាប់នេះការពាររចនាសម្ព័ន្ធរបស់តុលាការធម្មនុញ្ញ ដែលត្រូវបានគេមើលឃើញយ៉ាងទូលំទូលាយថា ជាមូលដ្ឋាននៃលទ្ធិប្រជាធិបតេយ្យនៅក្នុងប្រទេសអាល្លឺម៉ង់ក្រោយសង្រ្គាម ជាច្បាប់មូលដ្ឋាន ក្នុងនោះរួមទាំងទំហំនៃតុលាការដែលមានចៅក្រមចំនួន ១៦នាក់ អាណត្តិ ១២ឆ្នាំរបស់ចៅក្រម និងអាយុចូលនិវត្តន៍ជាកាតព្វកិច្ច ៦៨ឆ្នាំ។

យ៉ាងណាក្ដី រាល់ការកែប្រែ នាពេលខាងមុខ នឹងទាមទារសំឡេងភាគច្រើន ២ភាគ៣ នៅក្នុងសភាទាំង២ ជាជាងសំឡេងភាគច្រើនធម្មតា។ កញ្ចប់នេះក៏បង្កើតយន្តការ ដើម្បីជ្រើសរើសចៅក្រម នៅតុលាការ ប្រសិនបើមានការជាប់គាំង នៅក្នុងសភា ដែលទទួលខុសត្រូវលើការតែងតាំងរបស់ពួកគេ។

ច្បាប់នេះត្រូវបានគាំទ្រដោយអ្នកប្រជាធិបតេយ្យសង្គម (SPD), Greens, ប្រជាធិបតេយ្យសេរី (FDP) និងគណបក្ស CDU/CSU ខាងក្រុមអភិរក្សនិយម។ ចំណែកខាងក្រុមស្ដាំនិយមជ្រុល គឺគណបក្សជម្រើសផ្សេងសម្រាប់អាល្លឺម៉ង់ (AfD) ដែលស្ថិតនៅលំដាប់ទី២ នៅក្នុងការស្ទង់មតិ បានប្រឆាំងនឹងផែនការនេះ៕