បុគ្គលិកក្រុមហ៊ុនលក់រាយ អាម៉ាហ្សូន (Amazon.com) ជាច្រើននាក់ នៅរោងចក្រអាមេរិកចំនួន ៧កន្លែង បានឈប់ពីការងារនៅព្រឹកថ្ងៃព្រហស្បតិ៍ (១៩ ធ្នូ) ក្នុងអំឡុងពេលនៃការដើរទិញឥវ៉ាន់ថ្ងៃឈប់សម្រាកដ៏មមាញឹក ដើម្បីចេញតវ៉ានូវអ្វីដែលពួកគេនិយាយថាជាទង្វើអយុត្តិធម៌ និងសម្ពាធការងាររបស់ក្រុមហ៊ុនលក់រាយដ៏ធំមួយនេះចំពោះបុគ្គលិកខ្លួន។

បុគ្គលិកធ្វើការក្នុងឃ្លាំងនៅក្នុងទីក្រុងនានា រួមទាំងក្រុងញូវយ៉ក អាត្លង់តា និងសាន់ហ្វ្រាន់ស៊ីស្កូ បានចូលរួមនៅក្នុងអ្វីដែលមន្ត្រីក្រុមសហជីព ធីមស្ទើ (Teamsters) ហៅថា កូដកម្មដ៏ធំបំផុតមិនធ្លាប់មានប្រឆាំងនឹងក្រុមហ៊ុនអាម៉ាហ្សូន ដែលអាចបណ្តាលឱ្យមានការរង្គោះរង្គើនៅក្នុងប្រតិបត្តិការដឹកជញ្ជូនដ៏ទូលំទូលាយរបស់ក្រុមហ៊ុន។

ក្នុងនាមជានិយោជកឯកជនធំជាងគេទីពីររបស់ពិភពលោកបន្ទាប់ពីក្រុមហ៊ុន វ៉លម៉ាត (Walmart) ក្រុមហ៊ុនអាម៉ាហ្សូន ជាគោលដៅជាយូរមកហើយសម្រាប់សហជីពដែលនិយាយថា បន្ទុកការងាររបស់ក្រុមហ៊ុនទៅលើទាំងល្បឿន និងប្រសិទ្ធភាព អាចនាំឱ្យបុគ្គលិកមិនពេញចិត្ត។ ក្រុមហ៊ុននិយាយថា ខ្លួនបង់ថ្លៃឈ្នួលនាំមុខគេក្នុងឧស្សាហកម្ម និងប្រើប្រាស់ប្រព័ន្ធស្វ័យប្រវត្តិកម្មជាច្រើនដើម្បីកាត់បន្ថយភាពតានតឹងដដែលៗលើបុគ្គលិក។

ទោះជាយ៉ាងនេះក្ដី ក្រុមកម្មករប្រមាណ ១០០នាក់ ដែលចេញតវ៉ាតំណាងឱ្យបុគ្គលិករាប់សែននាក់ទៀតនោះ បានប្រាប់សារព័ត៌មានរ៉យទ័រថា ពួកគេចង់ឱ្យក្រុមហ៊ុនអាម៉ាហ្សូន មកតុចរចា និងទទួលស្គាល់សម្ពាធរបស់ពួកគេដើម្បីបំពេញតម្រូវការដែលប៉ះពាល់ដល់សុខភាពរបស់បុគ្គលិក៕