ភ្នំពេញ ៖ ទំហំពាណិជ្ជកម្មទ្វេភាគីរវាងកម្ពុជា-ចិន រយៈពេល ៩ខែ ដើមឆ្នាំ២០២១ សរុបការមានទំហំទឹកប្រាក់ប្រមាណជិត ៨ពាន់លានដុល្លារអាមេរិក កើនឡើងប្រមាណជាង ៣៨ ភាគរយ។

របាយការណ៍ក្រសួងពាណិជ្ជកម្ម បង្ហាញថា ចាប់ពីខែមករា ដល់ខែកញ្ញាឆ្នាំក្នុង២០២១ កម្ពុជា បាននាំចេញ​ទី​កាន់​ទីផ្សារចិន មានទំហំទឹកប្រាក់ប្រមាណជាង ១ ពាន់លានដុល្លារអាមេរិក កើនប្រមាណ៥២ ភាគរយ។

ដោយឡែក កម្ពុជា​នាំចូលពីប្រទេសចិន មានទំហំទឹកប្រាក់ប្រមាណជាង ៦ ៨០០ លានដុល្លារ​អាមេរិក កើន​ឡើង​ប្រមាណ ៣៦ ភាគរយ។ ទំហំពាណិជ្ជកម្មទ្វេភាគីប្រទេសទាំងពីរ សម្រេចបាន ៧ ៩០០ លានដុល្លារអាមេរិក ​កើនឡើង ៣៨ភាគរយ បើធៀបរយៈពេលដូចគ្នានិងឆ្នាំ ២០២០ ។

លោកឧកញ៉ា លឹម ហេង អនុប្រធានសភាពពាណិជ្ជកម្មកម្ពុជា ថ្លែងថា ទំហំពាណិជ្ជកម្មទ្វេ​ភាគី​កម្ពុជា-ចិន នឹង​មាន​កំណើន​ងើបឡើងកាន់តែល្អថែមទៀត ការនាំចេញផលិតផលរបស់​កម្ពុជា​ទៅ​កាន់ទីផ្សារចិនកាន់តែច្រើន​ ជាពិសេស​បន្ទាប់​ពីកិច្ចព្រមព្រៀងពាណិជ្ជកម្មសេរីកម្ពុជា-ចិន បានចូលជាធរមាន ។

លោកឧកញ៉ា ថា កម្ពុជា អាចនឹងក្លាយទៅជាមជ្ឈមណ្ឌលចែកចាយ​ ឬបោះដុំទំនិញរបស់ចិន នៅ​ក្នុងទីផ្សារ​អាស៊ាន ព្រោះតាមរយៈនៃកិច្ចព្រមព្រៀងនេះ ​ប្រភេទទំនិញជាច្រើននិងរួចពន្ធ ដែល​អាចឲ្យយើងលក់តម្លៃធូរថ្លៃនៅក្នុង ទីផ្សារ​អាស៊ានបាន។

ទាក់ទងការធ្វើពាណិជ្ជកម្មអន្តរជាតិ, ថ្មីៗនេះ ឯកឧត្តម ប៉ែន សុវិជាតិ អ្នកនាំពាក្យ និង​ជា​អនុរដ្ឋលេខាធិការ ក្រសួង​ពាណិជ្ជកម្ម ថ្លែងលើកឡើង ទីផ្សារនាំចេញផលិតផល ជាពិសេស​ទីផ្សារ​នាំចេញ​កសិផលរបស់កម្ពុជា បានជ្រៀត​ចូល​អន្តរជាតិជាបណ្តើរៗ ជាក់ស្តែងការនាំចេញអង្ករទៅ​កាន់​ទីផ្សារ​ប្រទេសចិន គឺបានកំពុងពេញនិយម ​និងមានការ​គាំទ្រ​យ៉ាង​ខ្លាំង៕

អត្ថបទ៖ សុន រ៉ាឌី