ទីភ្នាក់ងារសង្គ្រោះគ្រោះមហន្តរាយរបស់ប្រទេសម៉ូសំប៊ិកបានប្រកាសកាលពីថ្ងៃព្រហស្បតិ៍ទី១៩ធ្នូសប្ដាហ៍នេះថា ចំនួនអ្នកស្លាប់ដោយសារព្យុះស៊ីក្លូន ឈីដូ (Chido) នៅក្នុងប្រទេសម៉ូសំប៊ិក បានកើនឡើងដល់ ៧៣ នាក់ហើយ ៥៤៣ នាក់ត្រូវបានរាយការណ៍ថាបានរងរបួស។

ព្យុះស៊ីក្លូនដែលបានវាយប្រហារខេត្ត កាបូ ដេលហ្កាដូ (Cabo Delgado) និងខេត្ត ណាំពូឡា(Nampula) បានបណ្តាលឱ្យមានការបំផ្លិចបំផ្លាញយ៉ាងធ្ងន់ធ្ងរ បង្ខំឱ្យមនុស្សរាប់ពាន់នាក់ជម្លៀសចេញពីលំនៅឋាន និងបំផ្លាញហេដ្ឋារចនាសម្ព័ន្ធសំខាន់ៗ។

រដ្ឋាភិបាលបានបើកមជ្ឈមណ្ឌលស្នាក់នៅសង្គ្រោះបន្ទាន់ចំនួនពីរ ដែលបច្ចុប្បន្នមានមនុស្សកំពុងស្នាក់នៅចំនួន១.៣៤៩នាក់ ហើយត្រូវការជំនួយជាបន្ទាន់ នេះបើយោងតាមរបាយការណ៍ដែលចេញផ្សាយដោយវិទ្យាស្ថានជាតិសម្រាប់ការគ្រប់គ្រង និងកាត់បន្ថយហានិភ័យគ្រោះមហន្តរាយ (INGD)។

ការវិវត្តន៍ថ្មីនេះធ្វើឡើងតាមសេចក្តីថ្លែងការណ៍របស់ប្រធានាធិបតី ម៉ូសំប៊ិក លោក ហ្វីលីបពីនូស៊ី(Filipe Nyusi) កាលពីថ្ងៃពុធ ដោយបានសន្យាគាំទ្ររដ្ឋាភិបាលសម្រាប់ជួយជនរងគ្រោះនៃព្យុះស៊ីក្លូននេះ។

វិទ្យាស្ថានជាតិខាងលើបាននិយាយថា ព្យុះស៊ីក្លូននេះបានបំផ្លាញ ឬខូចខាតផ្នែកខ្លះនៃលំនៅឋានចំនួន ៣៦.២០៧ខ្នង រួមទាំងមូលដ្ឋានថែទាំសុខភាពចំនួន ៤៨ កន្លែង វិហារសាសនាចំនួន ១៣ កន្លែង បង្គោលភ្លើង ១៨៦ ដើម ប្រព័ន្ធទឹកចំនួន ៩ និងទូកនេសាទចំនួន ១៧១ គ្រឿង។ ទន្ទឹមនឹងនេះ សាលាចំនួន ១៤៩ កន្លែង បានរងផលប៉ះពាល់ដល់សិស្ស ១៥. ៤២៩ នាក់ និងគ្រូចំនួន ២២៤ នាក់៕