ប្រធានាធិបតី លោក Volodymyr Zelenskiy បាននិយាយកាលពីថ្ងៃព្រហស្បតិ៍ ទី១៩ ខែធ្នូ ថា ការធានាសន្តិសុខរបស់អឺរ៉ុប និងសង្គ្រាមដែលជាប់គាំង នឹងមិនគ្រប់គ្រាន់សម្រាប់អ៊ុយក្រែនដែលមានបំណងចង់ចូលរួមជាមួយសម្ព័ន្ធយោធាឆ្លងមហាសាគរអាត្លង់ទិកណាតូ នោះទេ។

លោក Zelenskiy បាននិយាយនៅក្នុងសន្និសីទសារព័ត៌មានថា អ៊ុយក្រែន «មិនអាចរស់នៅជាមួយជម្លោះដែលជាប់គាំង» ខណៈប្រទេសនេះចាំបាច់ត្រូវមានការធានា នៅពេលអនាគតដ៏ខ្លីខាងមុខ។

លោកបាននិយាយថា អ៊ុយក្រែន អាចពិចារណាពីការបញ្ជូនឧស្ម័នរបស់រុស្ស៊ីបន្ត ក្នុងលក្ខខណ្ឌដែលទីក្រុងមូស្គូ ពុំទទួលបានប្រាក់សម្រាប់ប្រេងឥន្ធនៈ រហូតដល់ក្រោយសង្គ្រាម ទោះបីជាអ៊ុយក្រែនកាលពីពេលពីមុន បានច្រានចោលការបន្តកិច្ចសន្យាផ្ទេរឧស្ម័នរុស្ស៊ី ទៅកាន់អឺរ៉ុប ក៏ដោយ។

ការអត្ថាធិប្បាយលើការចរចាររវាងប្រទេសរបស់លោក និងរុស្ស៊ីក្នុងឆ្នាំ ២០២២ លោក Zelenskiy បាននិយាយថា ពុំដែលមានកិច្ចព្រមព្រៀងនៅទីក្រុងអ៊ីស្តង់ប៊ុល ប្រទេសទួរគី រវាងប្រទេសទាំងពីរនោះទេ។

ប្រធានាធិបតីរុស្ស៊ី លោក វ្ល៉ាឌីមៀ ពូទីន បាននិយាយកាលពីថ្ងៃព្រហស្បតិ៍ថា កិច្ចព្រមព្រៀងបឋមដែលបានឈានដល់ រវាងអ្នកចរចារុស្ស៊ី និងអ៊ុយក្រែន ក្នុងអំឡុងសប្តាហ៍ដំបូងនៃសង្រ្គាមនៅឯកិច្ចពិភាក្សាក្នុងទីក្រុងអ៊ីស្តង់ប៊ុល ដែលពុំត្រូវបានអនុវត្ត អាចជាមូលដ្ឋានសម្រាប់ការពិភាក្សា នៅពេលអនាគត។

លោក Zelenskiy បានប្រតិកម្មទៅនឹងការលើកឡើងរបស់លោកពូទីន ក្នុងការសាកល្បងប្រព័ន្ធការពារដែនអាកាស ដោយការបាញ់មីស៊ីលបាលីស្ទីកល្បឿនលឿនជាងសំឡេង Oreshnik ថ្មីរបស់រុស្ស៊ី ទៅលើគោលដៅមួយ ក្នុងប្រទេសអ៊ុយក្រែន។